વડોદરા નગર પ્રા. શિક્ષણ સમિતિનું નવું બોર્ડ વિવાદોમાં ફસાયું છે. ઉલ્લેખનીય છે કે, તાજેતરમાં યોજાયેલા બાળ મેળામાં માત્ર ત્રણ દિ' માં 2.60 લાખ રૂપિયાનો ખર્ચ કરવામાં આવ્યો હતો.
વડોદરા નગર પ્રાથમિક શિક્ષણ સમિતિનું નવું બોર્ડ વિવાદમાં
બાળ મેળામાં CCTV અને બાઉન્સર સહિતના ખર્ચનો વિવાદ
ત્રણ દિવસમાં 2.6 લાખ રૂપિયાનો ખર્ચ કરવામાં આવ્યો
વડોદરા નગર પ્રાથમિક શિક્ષણ સમિતિનું નવું બોર્ડ વિવાદમાં
તાજેતરમાં વડોદરા નગર પ્રાથમિક શિક્ષણ સમિતિના નવા પદાધિકારીઓ દ્વારા ગત તારીખ 11મી માર્ચથી ત્રણ દિવસના વિવિધતાસભર બાળમેળાનું સયાજીબાગ વિસ્તારમાં આયોજન કરવામાં આવ્યું હતું. જેનો શુભ આરંભ મેયર કેયુર રોકડિયા, રાજ્યના મહેસૂલ મંત્રી રાજેન્દ્ર ત્રિવેદી, મહિલા અને બાળ વિકાસ મંત્રી મનીષાબેન વકીલ અને સમિતિ પદાધિકારીઓ, ધારાસભ્યો, મહાનગર પાલિકાના પદાધિકારીઓ, નગરસેવકોની ઉપસ્થિતિમાં કરવામાં આવ્યો હતો. ત્યારે આ ત્રણ દિવસય બાળ મેળામાં વડોદરા નગર પ્રાથમિક શિક્ષણ સમિતિ દ્વારા રૂપિયા 2.60 લાખનો ખર્ચો કરવામાં આવતાં ભારે વિવાદ સર્જાયો હતો.
આયોજનમાં વધુ ખર્ચ કરાયાનો આક્ષેપ સમિતિના સભ્યો દ્વારા કરાયો
ઉલ્લેખનીય છે કે, આ બાળ મેળામાં વડોદરા નગર પ્રાથમિક શિક્ષણ સમિતિ દ્વારા CCTV,બાઉન્સરો સહિત વીડિયોગ્રાફી પાછળ 2.60 લાખનો ખર્ચ કરવામાં આવ્યો હતો. બાળ મેળામાં ચેરમેને ખર્ચ કર્યા બાદ તેના બીલ સભામાં મુક્યા હતાં. જેને લઈને સભ્યોમાં ચર્ચાઓ કરવામાં આવી હતી કે, આ બાળ મેળના આયોજનમાં વધુ ખર્ચ કરવામાં આવ્યો છે. ત્યારબાદ આ સભામાં સભ્યોમાંજ આંતરિક ખેંચતાણ શરૂ થઈ ગઈ હતી. અને બાળ મેળામાં CCTV અને બાઉન્સર સહિતના ખર્ચનો વિવાદ ઉભો થયો હતો.
આયોજનના ખર્ચને લઈ સભ્યોમાં જ આંતરિક ખેંચતાણ શરૂ થઈ
ઉલ્લેખનીય છે કે, આ બાળ મેળામાં બાળકો એ જાતે જહેમત ઉઠાવી વિવિધ પ્રોજેક્ટ બનાવ્યા હતાં. તેની સાથે આનંદ મેળો, ફૂડ સ્ટોલનો સમાવેશ કરવામાં આવ્યો હતો. ત્યારે વડોદરા શિક્ષણ સમિતિ દ્વારા આ બાળ મેળામાં દાતાઓનું સન્માન કરવામાં આવ્યું હતું. તેમજ કોવિડ તકેદારીઓ સાથે મેળો યોજવામાં આવ્યો હતો. અને મુલાકાતીઓ કોવિડ ગાઈડ લાઈન પાળે તેવો અનુરોધ કરવામાં આવ્યો હતો. અને સુરક્ષા માટે 36 જેટલા સી.સી.ટીવી નું નેટવર્ક રાખવામાં આવ્યું હતું. જેને લઈને વડોદરા શિક્ષણ સમિતિનું નવું બોર્ડ વિવાદમાં આવ્યું હતું.