NDA ઉમેદવાર દ્રૌપદી મુર્મુએ રાષ્ટ્રપતિની ચૂંટણીમાં વિજેતા જાહેર થતાંની સાથે 5 રેકોર્ડ પોતાના નામે કરી લીધા, દેશના સર્વોચ્ચ બંધારણીય પદ પર પહોંચનાર પ્રથમ આદિવાસી મહિલા નેતા બન્યા
દેશના આગામી રાષ્ટ્રપતિ તરીકે દ્રૌપદી મુર્મુની ઐતિહાસિક જીત
વિજેતા જાહેર થતાંની સાથે 5 રેકોર્ડ દ્રૌપદી મુર્મુના નામે થઈ ગયા
દેશના સર્વોચ્ચ બંધારણીય પદ પર પહોંચનાર પ્રથમ આદિવાસી મહિલા નેતા બન્યા
દેશના આગામી રાષ્ટ્રપતિ તરીકે દ્રૌપદી મુર્મુની ઐતિહાસિક જીત થઈ છે. NDA ઉમેદવાર દ્રૌપદી મુર્મુની જીત બાદ ચારે બાજુથી તેમણે અભિનંદન મળી રહ્યા છે. આ સાથે એવી વિગત મળી રહી છે કે, PM નરેન્દ્ર મોદી આવતીકાલે સાંજે 5:30 વાગ્યાથી દિલ્હીની હોટેલ અશોકામાં વિદાય લેતા રાષ્ટ્રપતિ રામનાથ કોવિંદ માટે વિદાય રાત્રિભોજનનું આયોજન કરશે. મહત્વનું છે કે, NDA ઉમેદવાર દ્રૌપદી મુર્મુએ રાષ્ટ્રપતિની ચૂંટણીમાં વિજેતા જાહેર થતાંની સાથે 5 રેકોર્ડ પોતાના નામે કરી લીધા છે.
પહેલો રેકોર્ડ :
દ્રૌપદી મુર્મુ દેશના સર્વોચ્ચ બંધારણીય પદ પર પહોંચનાર પ્રથમ આદિવાસી મહિલા નેતા બન્યા છે. મુર્મુનો જન્મ ઓડિશાના મયુરભંજ જિલ્લામાં સંથાલ સમુદાયના ગરીબ આદિવાસી પરિવારમાં થયો હતો. દેશમાં આજ સુધી કોઈ આદિવાસી વડાપ્રધાન કે રાષ્ટ્રપતિની ખુરશી સુધી પહોંચી શક્યા ન હતા. જો કે કેઆર નારાયણન અને રામનાથ કોવિંદના રૂપમાં દેશને 2 દલિત રાષ્ટ્રપતિ મળ્યા છે.
બીજો રેકોર્ડ:
દ્રૌપદી મુર્મુ પ્રથમ રાષ્ટ્રપતિ બન્યા કે જેઓ આઝાદી પછી દેશમાં જન્મ્યા હતા. દ્રૌપદી મુર્મુનો જન્મ 20 જૂન 1958ના રોજ થયો હતો. 1947માં દેશને આઝાદી મળ્યાના લગભગ 11 વર્ષ બાદ. દેશમાં અત્યાર સુધીના તમામ રાષ્ટ્રપતિનો જન્મ 1947 પહેલા થયો હતો. મુર્મુના રાષ્ટ્રપતિ બનતાની સાથે જ આ પ્રથમ વખત બન્યું કે, દેશમાં રાષ્ટ્રપતિ અને વડાપ્રધાનની ખુરશી પર એવા વ્યક્તિ છે જેમનો જન્મ સ્વતંત્ર ભારતમાં થયો હોય.
ત્રીજો રેકોર્ડઃ
સૌથી યુવા રાષ્ટ્રપતિ બનવાનો ખિતાબ પણ મુર્મુને ગયો છે. દેશમાં સૌથી યુવા રાષ્ટ્રપતિ બનવાનો રેકોર્ડ નીલમ સંજીવા રેડ્ડીના નામે છે. જે 1977માં બિનહરીફ રાષ્ટ્રપતિ બન્યા હતા. રેડ્ડીની ઉંમર 64 વર્ષ, 2 મહિના અને 6 દિવસની હતી જ્યારે તેમણે રાષ્ટ્રપતિ પદ સંભાળ્યું હતું. તે જ સમયે, 20 જૂન 1958ના રોજ જન્મેલા દ્રૌપદી મુર્મુની ઉંમર 25 જુલાઈ 2022ના રોજ પદ સંભાળતી વખતે 64 વર્ષ, 1 મહિનો અને 8 દિવસની છે.
ચોથો રેકોર્ડઃ
ભારતમાં એક સમયે કાઉન્સિલર રહી ચૂકેલા વ્યક્તિ રાષ્ટ્રપતિ પદ સુધી પહોંચ્યા તેવો આ પ્રથમ પ્રસંગ બન્યો છે. દ્રૌપદી મુર્મુએ 1997માં રાયરંગપુર નગર પંચાયતની કાઉન્સિલર બનીને પોતાની રાજકીય કારકિર્દીની શરૂઆત કરી હતી. ત્રણ વર્ષ પછી 2000માં તે પ્રથમ વખત ધારાસભ્ય બન્યા. તેઓ ઓડિશાની BJD-BJP સરકારમાં બે વખત મંત્રી પદ પણ સંભાળી ચૂક્યા છે.
પાંચમો રેકોર્ડ:
દ્રૌપદી મુર્મુની જીત સાથે ઓડિશાનું નામ પણ તે રાજ્યોમાં સામેલ થઈ ગયું જેના લોકો દેશના સર્વોચ્ચ બંધારણીય પદ સુધી પહોંચ્યા છે. અત્યાર સુધી રાષ્ટ્રપતિની ખુરશી પર બેઠેલા લોકોમાંથી 7 દક્ષિણ ભારતના છે. દેશના પ્રથમ રાષ્ટ્રપતિ ડો.રાજેન્દ્ર પ્રસાદ બિહારના હતા.