શરમજનક / અમદાવાદમાં ધાબા પર સૂતેલી 11 વર્ષની બાળકી સાથે પાડોશી નરાધમે અડપલાં કર્યાં

• બાળકીની સાથે શારીરિક અડપલાં કરનાર યુવક વિરુદ્ધમાં કાગડાપીઠ પોલીસ સ્ટેશનમાં ફરિયાદ
• પડોશમાં રહેતો યુવકે ધાબા પર સુઇ રહેલી 11 વર્ષની બાળકી સાથે શારીરિક અડપલાં કર્યાં હતાં

ગીતા મંદિર બસ સ્ટેન્ડ નજીક રહેતી એક મહિલાએ પડોશમાં રહેતા યુવાન સામે પોક્સો એક્ટ હેઠળ શારીરિક અડપલાં કર્યાંની ફરિયાદ કરી છે. મહિલાએ ફરિયાદ આક્ષેપ કર્યા છે કે ગરમી હોવાના કારણે તેઓ પરિવાર સાથે રાતે ધાબા પર સુવા માટે જાય છે.

થોડાક દિવસ પહેલાં સવારમાં તેઓ કામ કરવા માટે નીચે આવ્યા હતા ત્યારે તેમની 11 વર્ષની દીકરી ધાબા પર સુઈ રહી હતી. આ દરમિયાન પડોશમાં રહેતો યુવક બાળકીની બાજુ આવીને સુઈ ગયો હતો અને શારીરિક અડપલાં કરવા લાગ્યો હતો.

બાળકીએ તેની માતાને જાણ કરતાં તેમણે આ યુવાનને બોલાવી ફરી આવું ના કરવા ઠપકો આપીને જવા દીધો હતો. જ્યારે 31મી મેના દિવસે જ્યારે બાળકી તેની માતા સાથે ધાબા પર ગયા ત્યારે આ યુવક તેની માતા સાથે ધાબા પર હતો. જેથી મહિલાએ યુવકની માતાને આ બાબતની જાણ કરીને તેને સમજાવવા માટે કહ્યું હતું. 

મહિલાની વાત સાંભળતા યુવકની માતા ઉશ્કેરાઈને ફરિયાદી મહિલા સાથે ઝઘડો કર્યો હતો. જેમાં મહિલા એ સમગ્ર ઘટનાની જાણ પોલીસને કરતા કાગડાપીઠ પોલીસે યુવક વિરુદ્ધમાં ફરિયાદ નોંધીને તપાસ શરૂ કરી છે.