ઓનલાઈન પરીક્ષા માટે યુનિવર્સિટી મર્યાદિત સમય આપી રહી છે. તો બીજી તરફ વિદ્યાર્થિઓને એરરના કારણે એપ્લિકેશન ખોલવામાં સમય બગડી રહ્યો છે.
ગુજરાત યુનિ.ની ઓનલાઈન પરીક્ષામાં વિદ્યાર્થીઓ મુંઝવણમાં
એપ્લિકેશનમાં એરરના કારણે વિદ્યાર્થીઓનો સમય બગડે છે
પરીક્ષામાં 1 મિનિટમાં એક સવાલનો જવાબ આપવાનો છે નિયમ
ગુજરાત યુનિવર્સિટી દ્વારા લેવામાં આવતી B.comની ઓનલાઈન પરીક્ષામાં છબરડાઓની હદ નથી. એક તરફ ઓનલાઈન પરીક્ષા માટે યુનિવર્સિટી મર્યાદિત સમય આપી રહી છે. તો બીજી તરફ વિદ્યાર્થિઓને એપ્લિકેશન ખોલવામાં સમય બગડી રહ્યો છે. યુનિવર્સિટી દ્વારા 50 માર્ક્સના પેપર માટે 50 મિનિટ આપવામાં આવી રહ્યો છે. એક પ્રશ્ન માટે 1 મિનિટનો જ સમય અપાયો છે. પરંતુ 4:45 મિનિટે ઓપન થતી પરીક્ષામાં વિદ્યાર્થીઓને લોગઈન કરવા માટે 15 મિનિટ જેટલો સમય બગડી રહ્યો છે. જેના કારણે પરીક્ષામાં પૂરતુ સ્કોરિંગ કરી શકાતું નથી. જો કે, યુનિવર્સિટીની આ પ્રકારની બેદરકારી પહેલી વખત નથી. હજારોની સંખ્યામાં વિદ્યાર્થિઓ એપ્લિકેશનમાં સમસ્યા અનુભવી રહ્યા છે.
ગુજરાત યુનિવર્સિટીની ગઈકાલથી કુલ 17 જેટલી પરીક્ષા શરૂ થઇ છે. આ પરીક્ષા 48 હજારથી વધુ વિદ્યાર્થીઓ આપી રહ્યા છે. રોજના 5 સ્લોટમાં પરીક્ષા લેવાઇ રહી છે. આ વખતની પરીક્ષામાં ગેરરીતિને રોકવા કડક નિયમો સાથે પરીક્ષા લેવાઇ રહી છે.
તો નિયમો તો કડક બનાવી દીધા પરંતુ ટેક્નિકલ ખામીઓ દૂર ન કરી શક્યા. યુનિવર્સિટીની પરીક્ષામાં વિદ્યાર્થીઓ દ્વારા 50 મિનિટમાં 50 MCQ પૂર્ણ થયા બાદ પેપર સબમિટ કરવાનું હોય છે. પરંતુ જ્યારે વિદ્યાર્થીઓએ પેપર સબમીટ કર્યું તો પેપર સબમીટ ના થઇ શક્યું. અનેક વિદ્યાર્થીઓને સબમિટ કરવામાં મુશ્કેલી ઉભી થઇ હતી. કેટલાક વિદ્યાર્થીઓને એક્સપાઇર થઇ ગયું હોવાનું જણાવતા હતા. જોકે જેમની પરીક્ષા પૂર્ણ ન થઇ શકી હોય તેમના માટે વૈકલ્પિક વ્યવસ્થા ગોઠવવામાં આવી છે.
જો કે, ઓનલાઈન પરીક્ષાની સમસ્યાની ફરિયાદોના કારણે ગુજરાત યુનિવર્સિટીએ એક પરિપત્ર જાહેર કર્યો છે. જેમાં જણાવાયું છે કે, ફેબ્રુઆરી 2020 ઓનલાઇન પરીક્ષા અંતર્ગત લેવાયલી પરીક્ષાઓ દરમિયાન જે વિદ્યાર્થીઓ પરીક્ષા પૂર્ણ ન કરી શક્યા હોય અથવા વિક્ષેપ પડેલ હોય તેમની પરીક્ષા પૂર્ણ કરવા માટે વૈકલ્પિક વ્યવસ્થા ગોઠવવામાં આવશે. જે અંગેની વિગતવાર જાહેરાત વેબસાઇટ www.gujaratuniversity.ac.in પર કરવામાં આવશે.