સૂચના / બેન્ક હવે ગ્રાહકોને 24x7 આપશે આ સુવિધા, RBIએ બદલ્યો નિયમ

• ગ્રાહકોની સુવિધા માટે RBIએ બદલ્યો નિયમ
• 16 ડિસેમ્બરથી NEFTની સુવિધા 24 કલાક મળશે
• કોઈપણ સમયે ઓનલાઈન ટ્રાન્સફર કરી શકાશે 2 લાખ રૂપિયા

હકીકતમાં રિઝર્વ બેન્ક ઓફ ઈન્ડિયાની સૂચના મુજબ, 16 ડિસેમ્બરથી બેન્ક કસ્ટમરને કોઈપણ દિવસે અને કોઈપણ સમયે (NEFT) દ્વારા એક ખાતામાંથી બીજા ખાતામાં પૈસા ટ્રાન્સફર કરવાની સુવિધા ઉપલબ્ધ કરાવશે. એટલે કે (NEFT) દ્વારા ઓનલાઈન ટ્રાન્ઝેક્શનની સુવિધા હોલીડે સહિત સપ્તાહના સાતેય દિવસ ઉપલબ્ધ રહેશે. 

કેન્દ્રીય બેન્કે તેના માટે બેન્કોને જરૂર પ્રમાણે રકમ પણ ઉપલબ્ધ કરાવાની સૂચના આપી હતી. NEFT એ ઓનલાઈન અન્ય ખાતાધારકોને ફંડ ટ્રાન્સફર કરવાની પ્રક્રિયા છે. સાથે જ આરબીઆઈએ બેન્કોને કહ્યું છે કે, તેમની સુવિધાઓનું ધ્યાન રાખે, જેથી ગ્રાહકોને ફંડ ટ્રાન્સફર કરવામાં કોઈપણ પરેશાની થાય નહીં. 

NEFT એ ઓનલાઈન ટ્રાન્ઝેક્શનની એક રીત છે. જે હેઠળ ગ્રાહક એક સાથે 2 લાખ રૂપિયા સુધીની રકમ ઓનલાઈન ટ્રાન્સફર કરી શકે છે. સામાન્ય દિવસોની વાત કરીએ તો NEFT સવારે 8 વાગ્યાથી સાંજે 6.30 વાગ્યા દરમિયાન થાય છે. જ્યારે પહેલાં અને ત્રીજા શનિવારે સવારે 8થી બપોરે 12.30 વાગ્યા સુધી જ આ સુવિધા ઉપલબ્ધ થઈ શકતી હતી. જેથી તેને લઈને હાલમાં જ રિઝર્વ બેન્કે સૂચના જાહેર કરી છે. 

ઉલ્લેખનીય છે કે, હાલમાં જ RBIએ NEFT અને RTGS પર કોઈપણ પ્રકારનો ચાર્જ ન લેવાની સૂચના આપી હતી. જોકે, IMPS પર અત્યારે પણ બેન્કો તરફથી ચાર્જ લેવામાં આવે છે. IMPS દ્વારા નાની રકમ જ ટ્રાન્સફર થઈ શકે છે. જ્યારે RTGS દ્વારા મોટી રકમ ટ્રાન્સફર કરી શકાય છે. હવે NEFTની સુવિધા 24 કલાક થવાથી લોકોને પૈસા ટ્રાન્સફર કરવામાં કોઈ પરેશાની નહીં થાય. ગ્રાહક કોઈપણ સમયે 2 લાખ રૂપિયા ટ્રાન્સફર કરી શકે છે.