બોલિવૂડ સિંગર નીતિ મોહન તેના પરિવાર સાથે થોડાં દિવસ પહેલાં જ એક પર્સનલ ટ્રિપ પર ઓસ્ટ્રેલિયા ફરવા ગઈ હતી પરંતુ આ ટ્રીપ તેના માટે ડરામણી સાબિત થઈ. હકીકતમાં નીતિ મોહન ઓસ્ટ્રેલિયામાં કોરોના વાયરસના સંક્રમણને કારણે ફસાઈ ગઈ હતી અને આ ટ્રિપ પર પતિ નિહરા પંડ્યા અને બહેનો મુક્તિ મોહન અને શક્તિ મોહન પણ સાથે હતી. જોકે, હાલ આ સિંગર ટ્રિપને અધવચ્ચે છોડીને ભારત પરત આવી ગઈ છે. જોકે, તે આવતાંની સાથે જ પરિવાર સાથે આઈસોલેશનમાં જતી રહી છે.
બોલિવૂડ સિંગર નીતિ મોહન ઓસ્ટ્રેલિયાથી ભારત પરત આવી
નીતિ મોહને તેની ઓસ્ટ્રેલિયા ટ્રીપ પર વાત કરતા કહ્યું કે, ઓસ્ટ્રેલિયામાં કોરોના વાયરસ ફેલાવાની શરૂઆત થઈ અને અચાનકથી ત્યાં દર્દીઓની સંખ્યા વધવા લાગી. જ્યારે હોલિવૂડ એક્ટર ટોમ હેક્સ અને રીટા વિલ્સનને કોરોના વાયરસ પોઝિટિવ આવ્યો ત્યારે અમને બધાંને બહુ જ ડર લાગ્યો. ટોમ અને રીટા ઓસ્ટ્રેલિયામાં શૂટિંગ કરી રહ્યાં હતા. આ દરમિયાન મને લાગ્યું કે, જ્યારે આ લોકોને કોરોનાનો ચેપ લાગી શકે છે તો અમને પણ લાગી શકે છે. પછી અમારા પેરેન્ટ્સનો ફોન આવ્યો અને તેમણે અમને તરત જ ભારત પરત આવવા માટે કહ્યું.
નીતિ મોહને કહ્યું, ઓસ્ટ્રેલિયા ટ્રિપનો અનુભવ ખૂબ જ ખતરનાક હતો. અમે પહેલાં 17 માર્ચે ભારત પરત આવવાના હતા પરંતુ કોરોનાના વધતાં કેસને કારણે 12 માર્ચે જ સિંગાપુર અને દુબઈ થઈને ભારત પહોંચ્યા. જોકે, આ જગ્યાઓ પર પણ કોરોના વાયરસ ઝડપથી ફેલાઈ રહ્યો છે. નીતિએ આપવીતી જણાવતા આગળ કહ્યું- અમે જ્યારે એરપોર્ટ પર પહોંચ્યા તો બધું સુનસાન પડ્યું હતું. પછી અમે જ્યારે ભારત આવ્યા તો જોયું કે અહીં પણ આવી જ સ્થિતિ છે. અમે લોકોએ ભારત પરત આવ્યા બાદ ચેકઅપ કરાવ્યું અને પછી અમારા પુણેવાળા ફાર્મહાઉસમાં 14 દિવસ માટે આઈસોલેટ થઈ ગયા.
નીતિ મોહને આગળ કહ્યું કે, મારા સાસુ અને સસરાં બંને ડોક્ટર છે અને તેમણે જ મારી મદદ કરી. અમને ખબર નહોતી કે અમને કોરોનાનો ચેપ લાગ્યો છે કે નહીં પરંતુ અમે લોકોએ પોતાની દેખભાળ કરી અને તમામ જરૂરી વાતોનું ધ્યાન પણ રાખ્યું. આ સાથે જ તમને જણાવી દઈએ કે, નીતિ મોહનનો પરિવાર 14 એપ્રિલ સુધી પુણેવાળા ફાર્મહાઉસમાં જ રહેશે.