ભારે વરસાદની આગાહીને પગલે નવસારીમાં NDRFની ટીમ તૈનાત કરી દેવામાં આવી છે.
NDRFની ટીમ નવસારીમાં કરાઈ તૈનાત
વડોદરાથી એક ટીમ નવસારીમાં તૈનાત કરાઇ
21 સભ્યોની ટીમ નવસારી પહોંચી
ચોમાસાના વિધિવત પ્રારંભની સાથે આગામી પાંચ દિવસ દક્ષિણ ગુજરાતમાં અતિભારે વરસાદ ત્રાટકવાની હવામાન વિભાગ દ્વારા સંભાવના વ્યક્ત કરવામાં આવી છે. હવામાન વિભાગની આગાહીને લઈને આજે વેધરવોચ ગ્રુપની બેઠક પણ યોજાઇ હતી. જેમાં વરસાદની સંભાવનાગ્રસ્ત જિલ્લામાં NDRFની ટીમો સ્ટેન્ડબાય રાખવા સૂચના અપાઈ છે. જેને લઇ NDRFની 21 સભ્યોની ટીમને નવસારીમાં તૈનાત કરવામાં આવી છે. સાથે જ અન્ય એક ટીમને સ્ટેન્ડ બાય રહેવા આદેશ આપવામાં આવ્યો છે. નવસારી આવેલી આ ટીમને વડોદરાથી બોલાવવામાં આવી છે. જે પૂર સંભવિત વિસ્તારની મુલાકાત લેશે.
નવસારી જિલ્લામાં એન.ડી.આર.એફની ટીમનું આગમન થયું
પાંચ દિવસ ગુજરાત અને ખાસ દક્ષિણ ગુજરાતમાં ભારે વરસાદની આગાહી કરાઇ છે. જેમાં સુરત, નવસારી, તાપી અને ડાંગ જિલ્લામાં ભારે વરસાદ ૫ડવાની સંભાવના છે. આ આગાહીને લઈને વેધર વોચ ગૃપની બેઠકમાં રાહત કમિશનરે નવસારી જિલ્લામાં એક NDRFની ટીમ તૈનાત કરવા તાકીદ કરી હતી. ત્યારબાદ નવસારી જિલ્લામાં એન.ડી.આર.એફની ટીમનું આગમન થયું હતું. એન.ડી.આર.એફની ટીમ જરૂરી બચાવ સામગ્રી સાથે આવી ગઈ છે. જે પૂર પ્રભાવીત વિસ્તારોમાં કામગીરી કરશે.
હવામાન વિભાગની આગાહી
હવામાન વિભાગે ગુજરાતમાં વરસાદને લઇને આગાહી કરતા જણાવ્યું કે, 'રાજ્યમાં બે દિવસ બાદ દક્ષિણ ગુજરાતમાં ભારે વરસાદ વરસશે. તારીખ 24થી 26 જૂનના રોજ વલસાડ, નવસારી, ડાંગ, સુરત, વાપી અને દાદરા-નગર-હવેલીમાં ભારે વરસાદ વરસશે.' બીજી બાજુ હવામાન વિભાગે ઉત્તર ગુજરાત અને કચ્છમાં પણ સામાન્ય વરસાદ વરસશે, 'રાજ્યમાં આગામી બે દિવસ અમદાવાદ અને ગાંધીનગરમાં પણ છૂટોછવાયો વરસાદ વરસશે. જો કે, અમદાવાદમાં હજુ વરસાદની રાહ જોવી પડશે. 24 જૂનના રોજ થંડરસ્ટ્રોમ સાથે વરસાદ વરસે તેવી શક્યતા. તમને જણાવી દઇએ કે, રાજ્યમાં છેલ્લા 24 કલાકમાં 30 જિલ્લા અને તાલુકાઓમાં વરસાદ વરસ્યો છે, જેમાં સૌથી વધુ વરસાદ સાબરકાંઠાના વિજયનગરમાં 42 મિમી અને વિરમગામમાં 23 મિમીથી વધુ વરસાદ વરસ્યો. મહત્વનું છે કે, ગુજરાતમાં સૌરાષ્ટ્ર અને દક્ષિણ ગુજરાતમાં છેલ્લા પાંચેક દિવસથી દૈનિક છૂટાછવાયો વરસાદ પડી રહ્યો છે.