મોટા સમાચાર / NCP નેતા રેશમા પટેલ જોડાઈ શકે છે AAPમાં, ભાજપના આ દિગ્ગજ પાટીદાર ચહેરા સામે ચૂંટણી લડે તેવા સંકેત

• રેશ્મા પટેલ જોડાઇ શકે છે આમ આદમી પાર્ટીમાં 
• રેશમા પટેલ વિરમગામથી લડી શકે છે ચૂંટણી
• હાર્દિક પટેલ સામે લડી શકે છે ચૂંટણી રેશમા પટેલ

ગુજરાત વિધાનસભાના ચૂંટણી ટાણે તડજોડની રાજનીતિ પણ તેજ થઈ ગઈ છે. ભાજપ હોય કે આપ, કે પછી કોંગ્રેસ કદાવર નેતાને પોતાની પડખે કરી રાજકીય ગણિતના સોગઠાં ફીટ બેસાડવામાં ઘણખરા ઉમેદવારોની જાહેરાત બાદ પણ પાછી પાની કરી રહ્યા નથી ત્યારે ગુજરાતના રાજકારણના વધુ એક મોટા સમાચાર સૂત્રોના હવાલેથી મળી રહ્યા છે.

અંદરખાને આમ આદમી પાર્ટીએ એનસીપીમાં ઝાડુ ફેરવ્યું?
એનસીપીના ગુજરાત મહિલા પ્રમુખ રેશ્મા પટેલ બરોબર ચૂંટણીની મોસમ જામતા જ હવાફેર કરી શકે છે એટલે સૂત્ર મુજબ મળતી માહિતી અનુસાર રેશમા પટેલ આમ આદમી પાર્ટીમાં સામેલ થઈ શકે છે. મહત્વનું છે કે એનસીપી અને કોંગ્રેસનું ગઠબંધન થયા પછી રેશ્મા પટેલને ક્યાંથી લડાવવી તે પણ મોટો સવાલ બની ગયો હતો. તેવામાં અંદરખાને આમ આદમી પાર્ટીએ એનસીપીમાં ઝાડુ ફેરવ્યું હોય તેવા અંદેશા પ્રાપ્ત થઈ રહ્યા છે. 

વિરમગામ બેઠક પરથી ચૂંટણી લડશે?
વધુ મળતી વિગતો પ્રમાણે રેશમા પટેલને હાર્દિક પટેલની સામે એટલે કે વિરમગામ બેઠક પરથી ચૂંટણી મેદાનમાં ઉતારવામાં આવશે તેવા પણ સંકેત મળી રહ્યા છે. વિરમગામ બેઠક પર આપ પાર્ટીએ ઠાકોર સમાજના આગેવાન ચંદુજી ઠાકોરને ટિકિટ આપી છે. રેશમા પટેલના આવવાથી ઠાકોર સમાજમાં પણ રોષની લાગણી દુભાઈ શકે છે. રાજનીતિમાં સમય સાથે બધુ જ નક્કી છે. ત્યારે બુધવારની સવાર ગુજરાતની રાજનીતિમાં શું નવું લઈને આવે છે તે જોવું રહ્યું. હાલ તો રેશમાં પટેલના આપમાં આગમનનો મુદ્દો ગુજરાતમાં ચર્ચાનો વિષય બન્યો છે.