વાપીઃ બિહારનો ખૂંખાર નક્સલી વાપી જીઆઇડીસીની એક કંપનીમાંથી ઝડપાતા ચકચાર મચી ગઈ છે. ગુજરાત એટીએસની ટીમે વાપી જીઆઇડીસીમાં આવેલી ક્રિએટિવ ટેક્સટાઇલ કંપનીમાંથી રાજેશ નામના એક ઈનામી નકસલીની ધરપકડ કરી છે. આરોપી રાજેશ વાપીની ક્રિએટિવ ટેક્સટાઇલ કંપનીમાં ગોપાલ નામ ધારણ કરી અને સિલાઈનું કામ કરતો હતો. રેડીમેડ ગારમેન્ટ બનાવતી આ કંપનીમાં છેલ્લા ત્રણ મહિનાથી રાજેશને એક ખાનગી કોન્ટ્રાક્ટર દ્વારા કંપનીમાં કામે રાખવામાં આવ્યો હતો.
કંપનીના સંચાલકો અને મેનેજર પોતે કહી રહ્યા છે કે રાજેશ અહીંયા ગોપાલ પ્રસાદ નામથી રહેતો હતો અને કામ કરતો હતો. ખાનગી કોન્ટ્રાક્ટરે તેને કામે રાખેલ હોવાથી ખાનગી કોન્ટ્રાક્ટર પાસે તેના જરૂરી ઓળખના દસ્તાવેજો ન હતા.
સાથે જ રાજેશની સાથે રહેતો કામદાર પણ જે રાજેશનો દૂરનો સગો છે તે પણ તેના ગુનાહિત ભૂતકાળથી અજાણ હોવાનું જણાવી રહ્યો છે. પોલીસે જ્યારે રાજેશને ઉઠાવ્યો તે વખતે તેની સાથે રહેતા તેના દૂરના સગાએ જીઆઇડીસી પોલીસને જાણ કરી હતી. ત્યારબાદ બહાર આવ્યું કે રાજેશ ખતરનાક નક્સલી છે અને દેશ વિરોધી પ્રવૃતિ કરી ચૂક્યો છે.
અત્યારે ગુજરાત એટીએસની ટીમ ઝડપાયેલા નક્સલીની પૂછપરછ કરી રહી છે. જોકે 10 સીઆરપીએફના જવાનોની હત્યાના આરોપી એવા રાજેશ પર અનેક ગંભીર ગુનાઓ નોંધાયેલા છે. દેશદ્રોહ જેવા ગંભીર ગુનાનો ખુંખાર નક્સલી વાપીની આ કંપનીમાંથી ઝડપાતા ચકચાર મચી ગઈ છે. પોલીસે તેના સાથી કામદાર અને કંપનીના મેનેજર સાથે પણ વાત કરી હતી.