વિરોધ / બોર્ડની પરીક્ષાનું પરિણામ મોડું આવે તેવી શક્યતા, શિક્ષકોએ ઉત્તરવહી તપાસવાનો કર્યો ઈન્કાર, જાણો કારણ

• નવસારીમાં શિક્ષકોએ કર્યો વિરોધ
• બોર્ડની ઉત્તરવહી તપાસવાનો કર્યો ઈન્કાર
• શિક્ષકોની પડતર માંગ ન સ્વીકારાતા ઉત્તરવહી ચકાસણીનો બહિષ્કાર
   

રાજ્યમાં બોર્ડની પરીક્ષાઓ પૂર્ણ થઇ ગઇ છે.  પરંતુ આ વખતે આ  બોર્ડની પરીક્ષાનું પરિણામ મોડું આવી શકે છે. કારણ કે રાજ્યના શિક્ષણસંઘોએ પોતાની પડતર માંગણીઓને લઇને રાજ્ય સરકાર સામે બાંયો ચઢાવી છે.  હજારો  શિક્ષકોએ પેપર તપાસવાનો બહિષ્કાર કરતા તેની અસર પરિણામ પર પડી શકે છે.

નવસારીમાં શિક્ષકોએ કર્યો વિરોધ

નવસારીમાં શિક્ષકોએ પડતર માંગણીઓ ન સંતોષાતા બોર્ડની ઉત્તરવહી ચકાસવાનો ઇન્કાર કરી દીધો. શિક્ષકોની પડતર માંગ ન સ્વીકારાતા ઉત્તરવહી ચકાસણીનો બહિષ્કાર કર્યો.  શાળાના પટાંગણમાં નારા લગાવીને શિક્ષકોએ વિરોધ કર્યો હતો.  જેને પરિણામે  વિદ્યાર્થીઓનું પરિણામ મોડું આવવાની શકયતા છે. 

શિક્ષકોએ પેપર તપાસવાનો બહિષ્કાર કર્યો

મહત્વનું છે કે પડતર પ્રશ્નોનો નિકાલ ન થતા શૈક્ષિક સંઘોએ સાથે મળીને બોર્ડની પરીક્ષાના પેપર તપાસવા માટે ઇન્કાર કરી દીધો છે. જો સરકારે આગામી દિવસોમાં આ મુદ્દે કોઈ ઉકેલ નહી લાવે અને શૈક્ષિક સંઘો પોતાની વાત પર અડગ રહેશે તો મૂલ્યાંકન કામગીરી અટકી જશે જેની સીધી અસર પરિણામ પર જોવા મળશે.. મહત્વનું છે કે  ગુજરાત રાજ્ય શૈક્ષણિક સંઘ સંકલન સમિતિએ મુખ્યમંત્રી, નાણાંમંત્રી અને શિક્ષણ મંત્રીને આવેદનપત્ર આપીને આગામી બોર્ડ પરીક્ષાની ઉત્તરવહી મૂલ્યાંકન કામગીરીનો બહિષ્કાર કરવાની ચીમકી આપી હતી. શૈક્ષણિક સંઘે રજૂઆત કરી હતી કે પાંચ વર્ષની ફિક્સ પગારની નોકરી સળંગ ગણવા  ગ્રાન્ટેડ માધ્યમિક અને ઉચ્ચતર માધ્યમિક સ્કૂલના શિક્ષકો માટે પરિપત્ર કરાયો નથી.

જો પેપર મૂલ્યાંકન અટકાય તો શું થઈ શકે?

બોર્ડના વિદ્યાર્થીઓનું પેપર મૂલ્યાંકન ન થાય તો બોર્ડનું પરિણામ ન આવે
પેપર મૂલ્યાંકનમાં વિલંબ થાય તો પરિણામમાં વિલંબ થાય
પરિણામ વિલંબે આવે તો નવા વર્ષના એડમિશનમાં વિલંબ થાય 
એડમિશન મોડા થાય તો શૈક્ષણિક વર્ષનું કેલેન્ડર ખોરવાય
ધોરણ 12 પછી વધુ અભ્યાસ માટે વિદેશ જવા ઇચ્છતા વિદ્યાર્થીઓનુ શિડયુલ ખોરવાય

શૈક્ષિક સંઘોની શું છે માંગણી ?

જૂની પેન્શન યોજના લાગુ કરવામાં આવે
પાંચ વર્ષની નોકરી સળંગ ગણવામાં આવે
 7મુ પગાર પંચના બાકી રહેલા હપ્તા ચૂકવવામાં આવે
એક એક વર્ગની શાળામાં 3 શિક્ષક અને 1 આચાર્યનું મહેકમ આપવામાં આવે
પરિણામ આધારિત ગ્રાન્ટ આપવામાં આવે તે નિયમ દૂર થાય 
બિન સૈક્ષણિક કર્મચારીઓની બઢતી તથા ભરતી કરવામા આવે
સાતમા પગાર પંચના એરિયર્સના બાકી હપ્તા ચુકવવામાં આવે 
આચાર્યો અને વહિવટી કર્મચારીઓને એલટીસીનો રોકડ વિકલ્પનો લાભ આપવામાં આવે