રાહત / નવસારીના એક પશુ દીઠ 4 કિલો ઘાસચારો આપવાનો રાજ્ય સરકારનો નિર્ણય, મહેસૂલ મંત્રીએ આપી માહિતી

• નવસારીમાં પશુઓ માટે ઘાસચારા અછત છે: રાજેન્દ્ર ત્રિવેદી
• એક પશુ માટે 4 કિલો ઘાસ આપવા નિર્ણય: રાજેન્દ્ર ત્રિવેદી
• મંત્રી નરેશ પટેલની નવસારીના પશુઓ માટેની રજૂઆત હતી

કુદરતી આફત જેની સામે મનુષ્ય હંમેશા લાચાર જ હોય છે. દક્ષિણ ગુજરાતમાં મેઘાની તોફાની બેટિંગે અનેક લોકોને લાચાર બનાવી દીધા છે. ગાંડીતૂર થયેલી નદીઓના નીર આ લોકોનું બધું જ તાણી ગયા. ન તો ખાવા માટે અનાજ રહ્યું છે, ન તો રહેવા માટે છત. હવે જિંદગીની ટ્રેન પાટા પરથી ખડી ગઈ છે. તો માનવજીવનની સાથે પશુઓને પણ ખાવા ચારો નથી રહ્યો. આ સ્થિતિ વચ્ચે મહેસૂલ મંત્રીએ પશુઓને ઘાસચારા માટે મહત્વની જાહેરાત કરી છે.

એક પશુ માટે 4 કિલો ઘાસ આપવા નિર્ણય: મહેસૂલ મંત્રી
મહેસુલ મંત્રી રાજેન્દ્ર ત્રિવેદીએ પ્રેસ કોન્ફરન્સ કરી હતી. જેમાં તેમણે જણાવ્યું કે, નવસારી જિલ્લામાં આજે વરસાદે વિરામ લીધો છે ત્યારે અબોલ પશુઓ માટે સૂકા ઘાસચારાની માંગ આવતા મુખ્યમંત્રીએ અબોલ પશુઓને ઘાસચારો આપવાનો નિર્ણય કર્યો છે. મંત્રી નરેશ પટેલની નવસારીના પશુઓ માટેની રજૂઆત હતી. પશુઓ માટે ઘાસચારા અછત છે. નવસારીમાં એક પશુ દીઠ એક કુટુંબમાં વધુમાં વધુ 5 ઢોર માટે નિઃશુલ્ક ઘાસ પહોંચાડાશે. પંચમહાલ કે નજીકની જગ્યાઓ પરથી સરળ પડશે ત્યાંથી નવસારી જિલ્લાના જરૂરીયાત મંદ માલધારીઓને ઘાસચારો નિઃશુલ્ક પહોંચાડવામાં આવશે, જેનું વિતરણ આજથી શરૂ થઈ જશે.

નવસારી સર્વેની કામગીરી માટે 132 ટીમ બનાવાઈઃ
વધુમાં ત્રિવેદીએ જણાવ્યું કે, આજથી કેશડોલ ચૂકવવાનું શરૂ થઈ ગયું છે. નવસારીમાં સર્વેની કામગીરી શરૂ થઈ ગઈ છે. 132 ટીમ નવસારી જિલ્લા માટે રચાઈ છે. 2 એડિ. કલેક્ટર, 5 ડે.કલેક્ટર ફાળવાયા છે. 23 ગામમાં વીજ પુરવઠો બંધ છે.

4 નેશનલ હાઇવે બંધ છેઃ મહેસૂલ મંત્રી
સ્ટેટ હાઇવેની સ્થિતિને લઇ મંત્રી રાજેન્દ્ર ત્રિવેદીએ નિવેદન આપ્યું છે. તેમણે જણાવ્યું છે કે, કચ્છમાં 2 સ્ટેટ હાઇવે બંધ છે. છોટા ઉદેપુર, ભરૂચ, વલસાડ, ડાંગમાં 1-1 સ્ટેટ હાઇવે બંધ છે. રાજકોટમાં 2 અને પોરબંદરમાં 1 સ્ટેટ હાઇવે બંધ છે. 4 નેશનલ હાઇવે બંધ છે.

157 મકાનો સંપૂર્ણ નાશઃ મહેસૂલ મંત્રી
રાજ્યમાં વરસાદને લઇ મહેસૂલ મંત્રી રાજેન્દ્ર ત્રિવેદીએ કહ્યું કે, 157 મકાનો સંપૂર્ણ નાશ પામ્યા હતા. રેસ્ક્યૂ કરેલાની કુલ સંખ્યા 1513 છે. 717 પશુના મૃત્યુ થયા છે. 56 લોકોના મૃત્યુ થયા છે.