નવસારીમાંથી ઝડપાઇ રૂ.3.5 કરોડની જૂની ચલણી નોટો 4 આરોપીની ધરપકડ

નોટબંધી બાદ પણ હજુ જૂની ચલણી નોટો વટાવીને કમિશનનો ધીકતો ધંધો ચાલી રહ્યો છે. આવાં જ એક કમિશનનાં કાળા ધંધાનો નવસારી LCB પોલીસે પર્દાફાશ કર્યો છે. નવસારી જિલ્લાનાં ગ્રામ્ય વિસ્તારમાંથી પોલીસે કરોડો રૂપિયાની જૂની ચલણી નોટો ઝડપી પાડી છે. આ જૂની ચલણી નોટો મુંબઈથી નવસારી આવી હતી. ત્યારે નવસારી LCB પોલીસે આ જૂની ચલણી નોટો સાથે કુલ ચાર આરોપીઓની ધરપકડ કરીને આગળની કાર્યવાહી હાથ ધરી છે.

પોલીસે મહારાષ્ટ્રનાં નાલાસોપારાનાં જીતેન્દ્ર રકનિધિ પાણીગ્રહી નવસારીનાં જલાલપોરમાં રહેતા ફકીર ગુલામ મોટરવાલા મહારાષ્ટ્રનાં કુર્લાના મોહમ્મદ મોબીન મોહમ્મદ યાકુબ શેખ અને વલસાડનાં પારડીમાં રહેતા અલ્તાફ અયુબ શેખની ઘરપકડ કરીને વધુ તપાસ હાથ ધરી છે. નવસારી LCB પોલીસે આરોપીઓ પાસેથી રૂ. 500 અને રૂપિયા 1 હજારની જૂની ચલણી નોટો સાથે રૂ. 3.5 કરોડ ઝડપી પાડ્યાં છે.

પોલીસે બાતમીનાં આધારે આ જૂની ચલણી નોટો ઝડપી પાડી છે. પોલીસને બાતમી મળી હતી કે અંદાજે ત્રણ કરોડ જેટલી જૂની ચલણી નોટોનો વેપલો ઊંડાચ ગામે થવાનો છે. ત્યારે પોલીસે પણ ફિલ્મી ઢબે આરોપીઓને દબોચી પાડ્યા છે. પોલીસ તપાસમાં સામે આવ્યું કે આરોપીઓ મુંબઈથી 7 ટકાનાં દરે જૂની ચલણી નોટો લાવીને અહીં 10 ટકાનાં કમિશનથી ધંધો કરતા હતાં. પોલીસે આરોપીઓ પાસેથી જૂની ચલણી નોટો સાથે કાર પણ ઝડપી છે.