દેશમાં હજુ પણ કોરોનાનો કહેર યથાવત છે. કોરોનાનું સંક્રમણ અટકાવવા માટે આ વર્ષે સરકારે નવરાત્રી મહોત્સવ નહીં ઉજવવાની સૂચના આપી હતી. પરંતુ તેમ છતાં સરકારના જ એક સાંસદની હાજરીમાં ગરબા યોજવામાં આવ્યા. ખુદ સાંસદે જ સરકારના આદેશનો ભંગ કરતો વીડિયો વાયરલ થયો. પરંતુ સાંસદે આ અંગે કોઈપણ પ્રકારનો રદિયો આપવાનો ઈન્કાર કીર દીધો. ત્યારે જાણો કોણ છે એ સાંસદ અને કેવી રીતે કર્યો સરકારની કોવિડ ગાઈડલાઈનનો ભંગ...
ભાજપના સાંસદે નિયમોના ધજાગરા ઉડાવ્યા
દિપસિંહ રાઠોડે કર્યો નિયમોનો ભંગ
જાહેરમાં ગરબા યોજી લોકોને કર્યા ભેગા
નવરાત્રીમાં સરકારે ગરબા રમવા પર પ્રતિબંધ મૂક્યો હતો. સાબરકાંઠામાં એક સ્થળે થયેલા ગરબા આયોજનનો વીડિયો વાયરલ થયો છે. સાંસદ દીપસિંહ રાઠોડે ભાગપુર ગામમાં જ કોરોનાની ગાઇડલાઇનનો ભંગ કર્યો હોવાનો એક વીડિયો વાયરલ થયો છે. જેમાં સાંસદ દીપસિંહ રાઠોડે સોશિયલ મીડિયા પર જાહેર ગરબાનો એક વીડિયો શેર કર્યો છે. સાંસદે દશેરાની રાત્રે ફેસબુક લાઇવ કરી આ વીડિયો શેર કરાયો છે. આ વીડિયોમાં જોઇ શકાય છે કે સાંસદની હાજરીમાં જ સોશિયલ ડિસ્ટન્સિંગ સહિત કોવિડ 19ની ગાઇડલાઇનનો જાહેરમાં ભંગ થયો છે. તો બીજી તરફ 200થી વધુ લોકો પણ અહીં એકઠા થયા હતા.
આ ગરબા આયોજન કદાચ એટલા માટે બંધ નહીં રાખવામાં આવ્યુ હોય કે તેમાં ખુદ સાબરકાંઠા સાંસદ દીપસિંહ રાઠોડની હાજરી હતી. જે સરકારે કોરોનાનું સંક્રમણ અટકાવવા ગરબાના આયોજનો પર પ્રતિબંધ ફરમાવ્યો તે જ સરકારના સાંસદ દીપસિંહ રાઠોડની હાજરીમાં સરકારના આદેશનો ભંગ થયો અને સાંસદ દીપસિંહ રાઠોડ એ કાર્યક્રમનું મહેમાનપદ શોભાવતા રહ્યા. આને બેદરકારી કહેવી કે સરાજાહેર અનાદર? આ અંગે સાંસદનો અભિપ્રાય જાણવાનો પ્રયત્ન કર્યો તો સાહેબે ફોન ઉપાડવાની પણ તસ્દી લીધી નહીં.