અનરાધાર / નવસારીમાં કુદરતનો કોપ: ત્રણ-ત્રણ નદીઓ બની ગાંડીતૂર, અનેક ગામોમાં પાણી ઘૂસ્યા, NDRF-તંત્ર ઍલર્ટ 

• ગણદેવી તાલુકાની અંબિકા નદી ભયજનક સપાટી પર
• નવસારીની ઓરંગા નદીના આકાશી દ્રશ્યો આવ્યા સામે 
• અમલસાડ અને ગણદેવીને જોડતો રસ્તો બંધ, નદીમાં ફસાયેલી મહિલાઓનું રેસ્ક્યુ 

રાજ્યમાં હાલ વરસાદી વાતાવરણ વચ્ચે નવસારીમાં કુદરતનો કોપ જોવા મળ્યો છે. નવસારીથી ત્રણ-ત્રણ નદીઓ ગાંડીતૂર બની છે. નદીના પાણી અનેક ગામોમાં ઘૂસતા NDRF અને તંત્ર ઍલર્ટ બન્યું છે. ગણદેવી તાલુકાની અંબિકા નદી ભયજનક સપાટી પર છે. આ સાથે ચીખલી તાલુકાના હરણ ગામે પાણી ભરાયા હોવાની ઘટના સામે આવી છે. આ તરફ નવસારીની ઓરંગા નદીના આકાશી દ્રશ્યો સામે આવ્યા છે. જેમાં નોંધાઈ ગામે ઓરંગા નદીનો લો લેવલ પુલ પાણીમાં ગરકાવ હોવાનું દેખાઈ રહ્યું છે. 

ગણદેવી તાલુકાની અંબિકા નદી ભયજનક સપાટી પર

નવસારીમાં ભારે વરસાદને કારણે ગણદેવી તાલુકાની અંબિકા નદી ભયજનક સપાટી પર હોવાનું સામે આવ્યું છે. જેને લઈ સોનવાડી, ગડત અને દેસરા ગામને એલર્ટ કરાયા છે. આ સાથે બીલીમોરા શહેરમાં પાણી ભરાવાની શરૂઆત થઈ ગઈ હોય તેમ સ્મશાન પાણીમાં ડૂબ્યુ હતું. તો શિપયાર્ડ, માછીવાડ, દેસરા વિસ્તારમાં પણ પાણી ભરાઈ ગયા છે. 

ચીખલી તાલુકાના હરણ ગામે પાણી ભરાયા

નવસારીના ચીખલી તાલુકાના હરણ ગામે પાણી ભરાયા હોવાનું સામે આવ્યું છે. વિગતો મુજબ અંદાજે ગામના 40 કાચા ઘરોમાં પાણી ભરાયાનું સામે આવ્યું છે. આ તરફ ઘરમાં પાણી ભરાતા DDO અર્પિત સાગરે ગામની મુલાકાત લીધી હતી.

જ્યાં DDOએ અસરગ્રસ્તોના રહેવા-જમવાની વ્યવસ્થા કરવામાં આવી હતી. નોંધનીય છે કે, ચીખલીનું હરણ ગામ થયું સૌથી વધુ અસરગ્રસ્ત થયું છે. 

નવસારીની ઓરંગા નદીના આકાશી દ્રશ્યો આવ્યા સામે 

નવસારીમાં ભારે વરસાદને કારણે ઠેર-ઠેર પાણી ભરાયા છે. જેમાં નોંધાઈ ગામે ઓરંગા નદીનો લો લેવલ પુલ પાણીમાં ગરકાવ થયો છે. જેને લઈ ઓરંગા નદીના પાણી વધતા ચાર જેટલા ગામ સંપર્ક વિહોણા બન્યા છે. આ તરફ ખેરગામમાંથી વહેતી ઓરંગા નદીના આકાશી દ્રશ્યો સામે આવતા તેમાં પણ વરસાદે સર્જેલી તારાજી જોઈ શકાય છે. આ તરફ ચીખીલીમાં કાવેરી નદીમાં પૂર આવતા નદીના પાણી રિવરફ્રન્ટ પર ફરી વળ્યા હતા. જેને લઈ આજુ બાજુ ના 23 ગામોને અલર્ટ કરાયા. 

અમલસાડ અને ગણદેવીને જોડતો રસ્તો બંધ, નદીમાં ફસાયેલી મહિલાઓનું રેસ્ક્યુ 

નવસારીમાં સારો વરસાદ પડતાં અંબિકા નદીના ધમડાંછા પુલ ઉપર પાણી ફરી વળ્યા છે. જેને લઈ અમલસાડ-ગણદેવીને જોડતો રસ્તો બંધ થઈ ગયો છે. આ તરફ અંબિકા,કાવેરી નદીઓ ગાંડીતૂર બની છે. જેને લઈ કાવેરી,અંબિકા નદીમાં સતત જળસ્તરમાં વધારો થયો છે. આજે નદીમાં ફસાયેલી 7થી વધુ મહિલાઓનું સ્થાનિકોએ રેસ્ક્યુ કર્યું હતું. વિગતો મુજબ આ મહિલાઓ મોરલી ગામે નદી કિનારે ઘાસ કાપવા ગઇ હતી. 

તમામ અધિકારીઓને પોતાના વિસ્તારમાં રહેવા સૂચના

નવસારી જીલ્લાની દરેક નદીઓની સપાટીમાં વધારો થતાં તમામ અધિકારીઓને પોતાના વિસ્તારમાં રહેવા સૂચના આપવામાં આવી છે. નદીઓની સપાટીમાં વધારો થતા તંત્ર એલર્ટ બન્યું છે. નોંધનીય છે કે, પૂર્ણા, અંબિકા, કાવેરી,ખરેરા અને મીંઢળા નદીઓના જળસ્તરમાં પણ વધારો છે. તો વળી કાવેરી નદીએ તો ભયજનક સપાટી પણ વટાવી દીધી છે.