ટેક્નોલોજી / પેકેજીંગ ક્ષેત્રે ક્રાંતિ લાવશે ઇકો ગ્લુ: જાણો કેવી રીતે?

• વૃક્ષ અને છોડમાંથી નીકળતા ક્રિસ્ટલમાંથી બનાવાયો 
• ફિનલેન્ડના સંશોધકોએ સુપર ગ્લુ વિકસાવ્યો 
• એક ટીપું 90 કિગ્રા વજન સહી શકશે 

ફિનલેન્ડની આલ્ટો યુનિવર્સીટીના સંશોધકોએ કહ્યું છે કે ઇકો ગ્લુના એક ટીપામાં 90 કિગ્રા વજન સહન કરી શકવાની ક્ષમતા હશે. સામાન્ય રીતે કોઈ પણ ગ્લુથી ચીપકાવેલ વસ્તુને ખસેડવી મુશ્કેલ હોય છે જયારે ઇકો ગ્લુની મદદથી ચીપકાવેલી વસ્તુઓને એક આંગળીથી ધકેલીને અલગ અલગ કરી શકાશે.

આ અભ્યાસ એડવાન્સ મટીરીયલ નામની જર્નલમાં પ્રકાશિત થયો છે. તેમાં જણાવાયું છે કે આ ગ્લુથી જયારે બે સમતળ વસ્તુઓને ચીપકાવવામાં આવશે ત્યારે તેની ક્ષમતા અન્ય ચીપકાવાયેલી વસ્તુઓ કરતા 70 ગણી વધી જશે. 

આ અભ્યાસના લેખક બ્લાઈઝ ટાર્ડીએ જણાવ્યું છે કે માત્ર થોડા જ ટીપાંમાં વજન સહન કરવાની આ ક્ષમતા જબરજસ્ત છે. અને સૌથી મોટી વાત એ છે કે આ ગ્લુ છોડ અને વૃક્ષમાંથી બનેલો છે આથી તે પર્યાવરણ માટે અનુકૂળ છે. 

સંશોધકોએ જણાવ્યું છે કે વર્તમાનમાં આપણી પાસે જેટલા પણ ઉચ્ચ ક્ષમતાવાળા ગ્લુ છે તે બધા જ જટિલ અને ખૂબ જ મોંઘા છે, પરંતુ ઇકો ગ્લુ બનાવવાની રીત સાધારણ અને પ્રાકૃતિક છે. 

કેવી રીતે તૈયાર થાય છે?

તેને છોડ અને વૃક્ષમાંથી નીકળનાર ઘટકમાં પાણી મિક્સ કરીને તૈયાર કરવામાં આવે છે. સંશોધકોના મતે આ ગ્લુ સખત હોવાનું કારણ પાણીનું બાષ્પીભવન છે. આ પ્રક્રિયામાં 2 કલાકનો સમય જાય છે. વૈજ્ઞાનિકોના મતે તેને ગરમીથી નિયંત્રિત કરી શકાય છે.