નેશનલ / ફરી એક ફ્લાઇટમાં ટેક્નિકલ ખામી ? વિમાન દિલ્હી એરપોર્ટ પર પરત ફર્યું

Indigo Flight : અમદાવાદ પ્લેન ક્રેશ બાદ હવે પ્લેનમાં ટેકનિકલ ખામી કે પછી ઇમરજન્સી લેન્ડિંગની ઘટનાઓમાં સતત વધારો થયો છે. આ તરફ હવે દિલ્હીથી લેહ જતી ઇન્ડિગોની ફ્લાઇટ 6E 2006 ને ટેકનિકલ ખામીને કારણે દિલ્હી પરત ફરવું પડ્યું. આ ફ્લાઇટ ગુરુવારે સવારે 6:30 વાગ્યે દિલ્હીથી ઉડાન ભરી હતી પરંતુ ટેકઓફ કર્યા પછી થોડીવારમાં ટેકનિકલ ખામી જણાતાં વિમાનને દિલ્હીના ઇન્દિરા ગાંધી આંતરરાષ્ટ્રીય એરપોર્ટ પર ઉતરાણ કરવું પડ્યું. જોકે એરલાઇન્સે ઇમરજન્સી લેન્ડિંગના દાવાઓને નકારી કાઢ્યા છે અને કહ્યું છે કે તે ટૂંક સમયમાં આ ઘટના અંગે વિગતવાર નિવેદન જાહેર કરશે.

પ્રાથમિક વિગતો મુજબ આ વિમાનમાં ક્રૂ મેમ્બર સહિત 180 લોકો સવાર હતા. ઈમરજન્સી લેન્ડિંગ બાદ બધાને સુરક્ષિત રીતે વિમાનમાંથી બહાર કાઢવામાં આવ્યા છે. વિગતો મુજબ આ ફ્લાઇટ લેહ પહોંચી ગઈ હતી. ફ્લાઇટ 6E 2006 એ દિલ્હીના ઇન્દિરા ગાંધી આંતરરાષ્ટ્રીય એરપોર્ટથી સવારે 6:30 વાગ્યે ઉડાન ભરી હતી.

આ ફ્લાઇટ લેહના કુશોક બકુલા રિમ્પોચી એરપોર્ટ (IXL) માટે નિર્ધારિત હતી. ફ્લાઇટ સામાન્ય રીતે ચાલી રહી હતી પરંતુ લેહ પહોંચતા પહેલા વિમાનમાં ટેકનિકલ ખામી જોવા મળી હતી. આ પછી પાયલોટે તાત્કાલિક પરિસ્થિતિનું મૂલ્યાંકન કર્યું અને સલામતીને ધ્યાનમાં રાખીને વિમાનને દિલ્હી પાછું લાવવાનો નિર્ણય લીધો.

આ પણ વાંચો : ઓપરેશન સિંધુ: ભારતે પોતાના લોકોને મોતના મુખમાંથી બચાવ્યા, ઈરાનથી 110 ભારતીય વિદ્યાર્થીઓ દિલ્હી પહોંચ્યા

વિમાનના લેન્ડિંગ પછી ઇન્ડિગોએ એક નિવેદન બહાર પાડીને કહ્યું કે, આ ઘટના દરમિયાન કોઈ કટોકટી જાહેર કરવામાં આવી નથી. એરલાઇને કહ્યું કે, તે ટૂંક સમયમાં આ ઘટના અંગે વિગતવાર નિવેદન બહાર પાડશે. જોકે અત્યાર સુધી ઇન્ડિગોએ ફ્લાઇટને ડાયવર્ટ કરવા અને દિલ્હી પરત લેન્ડિંગ કરવાના કારણો અંગે કોઈ સત્તાવાર નિવેદન જાહેર કર્યું નથી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ