કાર્યવાહી / નાગરિક હુમલા અંગે રક્ષા મંત્રી રાજનાથ સિંહની સેનાને સૂચના, 'પાકિસ્તાનને મજબૂત જવાબ આપવો જોઈએ'

તાજેતરમાં પાકિસ્તાની સેના તરફથી ભારતીય નાગરિક વિસ્તારો પર ડ્રોનથી હુમલાઓ કરવામાં આવ્યા છે. ખાસ કરીને નિયંત્રણ રેખા (LoC) નજીકના વિસ્તારોમાં એવા હુમલાઓમાં વધારો થયો છે, જેમાં પૂંછ અને રાજૌરી જેવા સેક્ટરોમાં તીવ્ર ગતિવિધિઓ નોંધાઈ છે. આ પરિસ્થિતિને ગંભીરતાથી લેતા ભારતના રક્ષા મંત્રી રાજનાથ સિંહે ભારતીય સેનાને પાકિસ્તાની સેના સામે કડક અને દંડાત્મક કાર્યવાહી કરવાનો નિર્દેશ આપ્યો છે. તેમણે સ્પષ્ટ રીતે જણાવ્યું કે પાકિસ્તાની સેના જે રીતે ભારતીય નાગરિકોને નિશાન બનાવી રહી છે, તેને હવે અસરકારક જવાબ મળવો જોઈએ.

આ મુદ્દે વધુ ચર્ચા કરવા માટે શનિવારે દિલ્હીમાં રક્ષા મંત્રીએ ચીફ ઓફ ડિફેન્સ સ્ટાફ (CDS) અને ત્રણેય સેનાઓના વડાઓ સાથે મહત્વપૂર્ણ બેઠક યોજી. આ પહેલા વડા પ્રધાન નરેન્દ્ર મોદીએ પણ ઉચ્ચ સ્તરીય બેઠક કરીને આ સંજોગોમાં કઈ રીતે આગળ વધવું તે અંગે માર્ગદર્શન આપ્યું હતું. આ બેઠકમાં રાષ્ટ્રીય સુરક્ષા સલાહકાર, સંરક્ષણ વિભાગના વડા અને અન્ય વરિષ્ઠ અધિકારીઓ હાજર રહ્યા હતા.

શુક્રવારે, ભારતીય સેનાએ જમ્મુ-કાશ્મીર, પંજાબ, રાજસ્થાન અને ગુજરાત જેવા રાજ્યોના 20થી વધુ શહેરોને નિશાન બનાવતા પાકિસ્તાની ડ્રોનને સફળતાપૂર્વક અટકાવ્યા હતા. ભારતે ઘણા સ્થળોએ પાકિસ્તાની યુદ્ધવિરામ ઉલ્લંઘનનો સશક્ત જવાબ આપ્યો છે.

આ પણ વાંચો : ભારતીય સેનાએ ઇસ્લામાબાદમાં મિસાઇલો છોડી, અનેક એરબેઝ પર જોરદાર વિસ્ફોટ

હમણાંની ઘટનાઓ વચ્ચે બંને દેશો વચ્ચે તણાવ વધ્યો છે પણ ભારતીય સશસ્ત્ર દળો સંપૂર્ણ સતર્કતાથી કાર્યરત છે અને નાગરિકોની સુરક્ષા માટે પ્રાથમિકતા આપવામાં આવી રહી છે. રક્ષા મંત્રી રાજનાથ સિંહે કહ્યુ કે પાકિસ્તાની સેના સામે એવી કાર્યવાહી થવી જોઈએ જેનાથી સરહદ પર શાંતિ અને સ્થિરતા સ્થાપિત થઈ શકે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ