મધ્યપ્રદેશ / આદિવાસીઓએ કર્યો પોલીસ ટીમ પર જીવલેણ હુમલો, ASIનું મોત, કિડનેપ યુવકને ગયા હતા છોડાવવા

મધ્યપ્રદેશના મઉગંજ જિલ્લાના શાહપુર પોલીસ સ્ટેશન વિસ્તારના ગડરા ગામમાં પોલીસ ટીમ પર હુમલાની ચોંકાવનારી ઘટના સામે આવી છે. અપહૃત યુવકને છોડાવવા ગયેલી પોલીસ પર આદિવાસી સમુદાયના લોકોએ હુમલો કરી દીધો, જેમાં ASI રામચરણ ગૌતમનું મોત નીપજ્યું. જયારે સ્ટેશન ઇન્ચાર્જ સહિત અન્ય ઘણા પોલીસકર્મીઓ ઘાયલ થઈ ગયા.

લગભગ બે મહિના પહેલા એક માર્ગ અકસ્માતમાં અશોક નામના આદિવાસી યુવકનું મૃત્યુ થઈ ગયું હતું. તેના પરિવારના સભ્યોએ તેને માત્ર અકસ્માત ન માનીને હત્યાની શંકા વ્યક્ત કરી અને સની નામના યુવકને આરોપી ગણાવ્યો. ગુરુવારે, હોળીના દિવસે, અશોકના પરિવારના સભ્યોએ સનીને પકડી લીધો, તેને બંધક બનાવ્યો અને તેને નિર્દયતાથી માર માર્યો. જેના કારણે તેનું ઘટનાસ્થળે જ મોત નીપજ્યું.

પોલીસ પર હુમલો અને ASI નું મોત

ઘટનાની માહિતી મળતા જ શાહપુર પોલીસ સ્ટેશનના ઇન્ચાર્જ સંદીપ ભારતીય તેમની ટીમ સાથે ઘટનાસ્થળે પહોંચી ગયા. પરંતુ જ્યારે પોલીસે સનીના મૃતદેહનો કબજો લેવા અને આરોપીઓની ધરપકડ કરવાનો પ્રયાસ કર્યો, ત્યારે આદિવાસી સમુદાયના લોકોએ લાકડીઓ અને પથ્થરોથી પોલીસ પર હુમલો કર્યો. આ હુમલામાં SHO સંદીપ ભારતીય, તહસીલદાર કુંવર લાલ પાણિકા, ASI બૃહસ્પતિ પટેલ, ASI રામચરણ ગૌતમ, SDOP અંકિતા સુલ્યા સહિત ઘણા પોલીસકર્મીઓ ઘાયલ થઈ ગયા.

આ પણ વાંચો: 'હિન્દીનો નહીં, પણ તેને ફરજિયાત બનાવવાનો વિરોધ...' ભાષા વિવાદ પર પવન કલ્યાણનું નિવેદન

વિસ્તારમાં વધ્યો તણાવ, ભારે પોલીસ બંદોબસ્ત તૈનાત

બધા ઘાયલોને સારવાર માટે મઉગંજ જિલ્લા હોસ્પિટલમાં મોકલવામાં આવ્યા, જ્યાં સારવાર દરમિયાન ASI રામચરણ ગૌતમનું મોત નીપજ્યું. ઘટનાની ગંભીરતા જોઈને વહીવટીતંત્ર હરકતમાં આવી ગયું. આ વિસ્તારમાં મોટી સંખ્યામાં પોલીસ દળ તૈનાત કરવામાં આવ્યા છે અને જિલ્લા એસપી અને કલેક્ટર ઘટનાસ્થળે પહોંચી ગયા છે. હાલમાં, પોલીસ સમગ્ર મામલાની તપાસ કરી રહી છે અને હુમલાખોરોની ઓળખ કરીને તેમની સામે કાર્યવાહી કરવાની તૈયારી કરી રહી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ