ચૂંટણી / કાલે છે રાજ્યમાં લોકસભાની ચૂંટણીનું મતદાન, પહેલીવખત વોટ કરનારા રાખો ખાસ ધ્યાન

2019ની લોકસભા ચૂંટણીમાં આ વખતે લગભગ 8 કરોડ મતદારો પ્રથમ વખત પોતાના મતાધિકારનો ઉપયોગ કરવા જઈ રહ્યા છે. જ્યારે પહેલીવાર મતદાન કરવાનું હોય ત્યારે મતદાનની સંપૂર્ણ પ્રક્રિયા વિશે થોડી મૂંઝવણ રહેતી હોય છે. તો ચાલો આજે જાણીએ મતદાનની સંપૂર્ણ પ્રક્રિયા.
 
પહેલાં પોતાનું મતદાન મથક શોધો:
તમે ઈલેક્શન કમિશનની વેબસાઇટ પર જઈને તમારા મતદાન મથકને શોધી શકો છો. ત્યાંથી તમને સીઈઓ, ડીઓઓ, ઇઆરઓ અને બીએલઓનો કોન્ટેક્ટ નંબર પણ મળી જશે. ચૂંટણી પંચ દ્વારા પૂરી પાડવામાં આવેલ મતદાર સ્લિપમાં પણ મતદાન મથકની જાણકારી મળી જશે.

મતદાન મથક પર જાઓ:
મતદાન મથકમાં પહોંચ્યા પછી તમને દરેક પક્ષનું અલગ-અલગ ડેસ્ક મળશે. કોઈપણ ડેસ્ક પર જાઓ અને મતદાર સૂચિમાં તમારું નામ જોઈ લો. પછી અંદર જાઓ અને લાઇનમાં ઊભા રહી જાઓ. જ્યારે તમારો વારો આવે ત્યારે તમારું અને તમારા પિતાનું નામ કહો. પછી ત્યાં હાજર મતદાન કર્મચારી તમારા નખ પર શાહી લગાવી દેશે.

 

EVMમાં મત આપો:
મતદાન વિભાગમાં અંદર જશો એટલે તમને ઇવીએમ દેખાશે. જે ઉમેદવારને તમે તમારો વોટ આપવા માગો છો તેના નામની સામેનું બટન દબાવો. બટન દબાવીને નીકળી ન જઓ. VVPAT માટે રાહ જુઓ. VVPATને સ્લીપ સાથે મેચ કરો કે તમારો મત યોગ્ય સ્થળે ગયો છે કે નહીં.

કયા દસ્તાવેજો લઈ જવા જોઈએ:
ચૂંટણી પંચ દ્વારા આપવામાં આવેલ મતદાર સ્લિપ લઈ જવાની રહેશે. જો મતદાર સ્લિપ નથી મળી અને મતદાર યાદીમાં તમારું નામ છે તો તમે મતદાર ઓળખ કાર્ડ અથવા સરકાર દ્વારા જારી કરાયેલ અન્ય ઓળખ પત્ર લઇને જઈ શકો છો.
 

વોટર લિસ્ટમાં આ રીતે શોધો તમારુ નામ:
ચૂંટણી કમિશનની વેબસાઇટ Electoralsearch.in પર લોગઈન કરો. અહીં બે રીતે મતદાતા પોતાનું નામ સર્ચ કરી શકે છે. પ્રથમ વિકલ્પમાં, નામ, જન્મ તારીખ અને કેટલીક અન્ય માહિતી નાંખી પોતાનું નામ ચકાસી શકાય છે. બીજા વિકલ્પમાં ઈલેક્શન કાર્ડ પર આપવામાં આવેલા EPIC નંબર દ્વારા જાણકારી મેળવી શકાય છે. EPIC નંબરને મતદાતા ઓળખ પત્ર ક્રમાંક કહેવાય છે. આ નંબર દ્વારા મતદાતા લિસ્ટમાં પોતાનું નામ ચકાસી શકે છે. ત્યારબાદ તમારી સામે વોટર લિસ્ટ ખૂલી જશે અને તમારી તમામ વિગતો ત્યાં જોવા મળશે. આ બધા પ્રયત્નો છતાં જો તમારું નામ ના દેખાય તો ચૂંટણી કમિશનના ટોલ ફ્રી નંબર 1800111950 પર કોલ કરીને માહિતી મેળવી શકાશે.