ચૂંટણી પૂર્વે રાજ્ય (Gujarat) માં કોંગ્રેસ દરેક પ્રકારની રણનીતિ અપનાવી રહ્યું છે. ત્યારે રાષ્ટ્રીય કોંગ્રેસે બે શહેરના મીડિયા કોઓર્ડીનેટરની નિમણૂંક કરી છે.
મિશન 2022ને લઇ રાષ્ટ્રીય કોંગ્રેસ સંપૂર્ણ એક્ટિવ
અમદાવાદ-બરોડાના મીડિયા કોઓર્ડીનેટરની કરી નિમણૂંક
મીડિયા કોઓર્ડીનેટર તરીકે રાધિકા ખેરાની નિમણૂંક
ગુજરાત વિધાનસભાની ચૂંટણી પહેલા રાજ્યમાં તમામ પક્ષો પોતપોતાની રીતે એડીચોટી સુધીનું જોર લગાવી રહ્યાં છે. તેમજ દરેક પક્ષ પોતપોતાની રીતે રણનીતિ ઘડી રહ્યું છે. ત્યારે ચૂંટણી પહેલા મિશન 2022 માટે રાષ્ટ્રીય કોંગ્રેસે મીડિયા કોઓર્ડીનેટરની નિમણૂંક કરી છે.
અમદાવાદ અને બરોડાના મીડિયા કોઓર્ડીનેટરની નિમણૂંક
મહત્વનું છે કે, રાજ્યમાં નજીકના સમયમાં ચૂંટણી આવી રહી છે. ત્યારે કોંગ્રેસ સંપૂર્ણ એક્ટિવ મોડમાં આવી ગયું છે. રાષ્ટ્રીય કોંગ્રેસે ચૂંટણી પહેલા અમદાવાદ અને બરોડાના મીડિયા કોઓર્ડીનેટરની નિમણૂંક કરી છે. મીડિયા કોઓર્ડીનેટર તરીકે રાષ્ટ્રીય કોંગ્રેસે રાધિકા ખેરાની નિમણૂંક કરી છે. જ્યાં સુધી આગામી ચૂંટણી પૂર્ણ ન થાય ત્યાં સુધી રાધિકા ખેરા આ જવાબદારી નિભાવશે.
કોંગ્રેસ ચૂંટણી પૂર્વે તમામ વિધાનસભામાં પદયાત્રા કરશે
ઉલ્લેખનીય છે કે, મિશન 2022 માટે કોંગ્રેસ તડામાર તૈયારીઓ કરી રહ્યું છે. ત્યારે કોંગ્રેસ ચૂંટણી પૂર્વે તમામ વિધાનસભામાં પદયાત્રા કરશે. દરેક વિધાનસભા વિસ્તારમાં પરિવર્તન સંકલ્પ પદયાત્રાનું પણ આયોજન કરવામાં આવશે. દરેક વિધાનસભા મતવિસ્તારમાં 5 કિ.મી.ની પદયાત્રાનું આયોજન કરાયું છે. તારીખ 1 અને 2 સપ્ટેમ્બરના રોજ અલગ-અલગ વિસ્તારોમાં આ પદયાત્રા યોજાશે. અમદાવાદની 8 વિધાનસભામાં 1 સપ્ટેમ્બરે કોંગ્રેસ પદયાત્રા યોજાશે. 2 સપ્ટેમ્બરે પણ 8 વિધાનસભામાં પરિવર્તન સંકલ્પ પદયાત્રા યોજાશે.પદયાત્રાના માધ્યમથી કોંગ્રેસે કરેલા કાર્યો લોકો સુધી પહોંચાડાશે.
કોંગ્રેસ 150થી વધુ બેઠક મેળવશે: ધાનાણી
ભાવનગરમાં એક દિવસ અગાઉ કોંગ્રેસ દ્વારા બોલો સરકાર અંતર્ગત મેનિફેસ્ટો પરિસંવાદનું આયોજન કરવામાં આવ્યું. આ કાર્યક્રમમાં વિધાનસભાના પૂર્વ વિપક્ષના નેતા પરેશ ધાનાણી હાજર રહ્યાં હતા. લોકો પાસેથી મેનિફેસ્ટોમાં કયા મુદ્દા લેવા જોઈએ તે અંગે પણ ચર્ચા કરવામાં આવી હતી. પરેશ ધાનણીએ જણાવ્યું હતું કે આ વર્ષે કોંગ્રેસ 150 બેઠક વિધાનસભામાં મેળવશે કાર્યકરોને આ વાત કરીને જુસ્સો વધાર્યો હતો.
મારું બુથ મારું ગૌરવ કેમ્પેઈન
ગુજરાત વિધાનસભાની ચૂંટણી નજીક આવતા ભાજપ, કોંગ્રેસ અને આમ આદમી પાર્ટીએ તૈયારીઓ શરૂ કરી દીધી છે, ત્યારે કોંગ્રેસે 'કોંગ્રેસનું કામ બોલે છે' શિર્ષક હેઠળ 'બોલો સરકાર' કેમ્પેઇન લોન્ચ કર્યું છે. આ કેમ્પેઈન અંતર્ગત કોંગ્રેસ કોંગ્રેસની સરકારમાં થયેલા કામની માહિતી લોકો સમક્ષ પહોંચાડી રહી છે. આ ઉપરાંત હવે કોંગ્રેસ પણ ભાજપના રસ્તે જઈ સંગઠન વધુ મજબૂત કરવા તરફ ધ્યાન આપશે. તેને લઈને બુથ મેનેજમેન્ટ માટે પ્રદેશ કોંગ્રેસે વ્યૂહરચના ઘડી છે. 'મારું બુથ મારું ગૌરવ' કેમ્પેઇન હેઠળ બુથોને મજબૂત કરવામાં આવશે. ઓગસ્ટ મહિનાના અંત સુધીમાં 52 હજાર બુથની વિગતો એકત્રિત કરાશે. તાલુકા પ્રમુખોને ચૂંટણી પ્રચારમાં લાગી જવા જરૂરી સૂચનાઓ આપી દેવામાં આવી છે.