ચંદ્રયાન 2 / ISROથી નહીં પરંતુ અહીંથી વિક્રમ લૅન્ડરનો સંપર્ક કરવા Hello મેસેજ મોકલાયો

• નાસાએ લેન્ડર વિક્રમને 'Hello'નો સંદેશ મોકલ્યો
• JPLએ વિક્રમને એક રેડિયો ફ્રીકવેન્સી મોકલી
• સંદેશ મોકલવાને લઇને નાસાના સૂત્રોએ આ અંગે કરી પુષ્ટી

ચંદ્રની સપાટી પર લેન્ડિંગ બાદ લેન્ડર વિક્રમ સાથે સંપર્ક તૂટી ગયા પછી ફરી સંપર્ક કરવા ISRO પ્રયત્ન કરી રહ્યું છે ત્યારે હવે દુનિયાની સૌથી મોટી અંતરિક્ષ એજન્સી હવે જોડાઇ છે. નાસાએ ચંદ્રની સપાટી પર રહેલા લેન્ડર વિક્રમ સાથે સંપર્ક કરવા 'Hello'નો સંદેશ મોકલ્યો છે.

પોતાના ડીપ સ્પેસ ગ્રાઉન્ડ સ્ટેશન નેટવર્કના આધારે નાસાની જેટ પ્રોપલ્સન લેબોરેટરી (JPL)એ લેન્ડર સાથે સંપર્ક સ્થાપિત કરવા માટે વિક્રમને એક રેડિયો ફ્રીક્વેન્સી મોકલી છે. નાસાના સૂત્રોએ આ અંગે પુષ્ટી કરી છે.

સૂત્રોએ આ અંગેની જાણકારી આપતાં કહ્યું કે 'હા નાસા/JPL વિક્રમ સાથે ડીપ સ્પેસ નેટવર્ક (DSN) દ્વારા સંપર્ક સ્થાપિત કરવાનો પ્રયત્ન કરી રહ્યું છે.' જો કે લેન્ડર વિક્રમ સાથે સંપર્ક સ્થાપિત કરવાની આશા દિવસેને દિવસે ઘટી રહી છે. પૃથ્વીના 14 દિવસ બાદ એટલે કે 20-21 સપ્ટેમ્બરે જ્યારે ચંદ્ર પર રાત થઇ જશે ત્યારબાદ વિક્રમ સાથે ફરી સંપર્ક કરવાની આશા પૂર્ણ થઇ જશે.

એક અન્ય અંતરિક્ષયાત્રી સ્કોટ ટિલ્લેએ પણ આ વાતની પુષ્ટી કરી છે કે નાસાના કેલિફોર્નિયા સ્થિત DSN સ્ટેશન દ્વારા લેન્ડરને રેડિયો ફ્રિક્વેન્સી મોકલવામાં આવી છે. ટિલ્લે તે સમયે ચર્ચામાં આવ્યાં હતા જ્યારે 2005માં ગુમ થયેલ નાસાના એક જાસૂસી ઉપગ્રહને શોધી કાઢ્યો હતો.

બુધવારે ઇસરોએ જણાવ્યું હતું કે લેન્ડર વિક્રમ સાથે ચંદ્રની સપાટી પર 2.1 કીમીની ઉંચાઇ પર નહીં પરંતુ 335 મીટર પર સંપર્ક તૂટી ગયો હતો. ઇસરોના મિશન ઓપરેશન કોમ્પલેક્સથી આ અંગેનો ખુલાસો કરવામાં આવ્યો છે.

ચંદ્રની સપાટીથી 4.2 કીમીની ઉંચાઇ પર પણ લેન્ડર વિક્રમ નક્કી કરાયેલા પથ પરથી ભટકી ગયું હતું પરંતુ જલ્દી તેને ઠીક કરી દેવામાં આવ્યું હતું. ત્યારબાદ જ્યારે ચંદ્રયાન-2નું વિક્રમ લેન્ડર જ્યારે ચંદ્રની સપાટીની 2.1 કીમી ઉંચાઇ પર પહોંચ્યું ત્યારે તે પોતાના પથ પરથી ભટકી બીજા રસ્તે જતું રહ્યું હતું.