કહ્યું- 'મારે કાન પકડવો પડે, મારાથી એક શબ્દ બોલાઈ ગયો માલધારી'
મોરબીમાં ચાલી રહેલી ભાગવત સપ્તાહના વ્યાસપીઠ પરથી કથાકાર રમેશ ઓઝાએ માલધારીઓ અંગે કરેલી ટિપ્પણીને લઈને વિવાદ સર્જાતા કથાકાર રમેશ ઓઝાએ વ્યાસપીઠ પરથી માંફી માંગી છે. તેમણે કહ્યું કે, 'મારે કાન પકડવો પડે, મારાથી એક શબ્દ બોલાઈ ગયો માલધારી. એક સમાજને ટાર્ગેટ કરીને બોલાયું હોય એવો મેસેજ ગયો. એમાં તમારો વાંક નથી મારો વાંક છે. મારે ત્યાં પશુપાલકો બોલવાની જરૂર હતી.'
આ પહેલા કથાકાર રમેશ ઓઝાએ કહ્યું હતું કે, 'વ્યાસપીઠ ઉપરથી જે કહેવાય છે તે કોઈ સમાજ વિશેષને ધ્યાનમાં રાખીને નથી કહેવાતું. સમગ્ર રીતે જનતાના હિત માટેની જે વાત હોય તે કહેવાતી હોય છે. આ સમસ્યા છે એ જનતા પણ કબૂલ કરે છે. હાઈકોર્ટે પણ નોંધ્યું છે અને નરીઆંખે દેખાય છે કે રસ્તાઓ ગૌશાળા બનેલા છે. દરેક સમસ્યાને રાજકીય રંગ આપવાનું બંધ કરો નેતાઓ. જો તમે જનકલ્યાણની વાતો કરતા હોય તો જનતાની માટે વિચારો. અહીંયા કોઈ પાર્ટીની વાત નથી, સમગ્ર રીતે જનતાના કલ્યાણની વાત છે. નિશ્ચિતપણે મારું દુર્ભાગ્ય છે કે મેં સદભાવના સાથે કહેલી વાતને એ લોકો દુર્ભાગ્યપૂર્ણ કહે છે. મેં એક નાગરિક તરીકે જે સમસ્યા છે, તેને તમારી સામે મૂકી છે.'
વ્યાસપીઠ ઉપરથી આપ્યું હતું આ નિવદન
વાસ્તવમાં મોરબીમાં ચાલી રહેલી ભાગવત સપ્તાહમાં કથાકાર રમેશ ઓઝાએ વ્યાસપીઠ ઉપરથી ગૌવંશને રસ્તા પર રઝડતા છોડી દેનાર પશુપાલકોને ટકોર કરતા ગઈકાલે જણાવ્યું હતું કે, 'નગર-નગરના રસ્તા-રસ્તા ગૌશાળા બની ગયા છે. હાઈકોર્ટે પણ સરકારને પગલા ભરવા કહ્યું છે. માલધારીઓ ગામના જોખમે અને ખર્ચે તમે દૂધ પીવાનું બંધ કરો, ગૌ સેવા કર્યા વગર તેનું દૂધ પીશો તો તે પચશે નહીં.'
કથાકાર રમેશ ઓઝાએ કરેલી ટિપ્પણી બાદ સર્જાયો હતો વિવાદ
કથાકાર રમેશ ઓઝાએ કરેલી ટિપ્પણી બાદ વિવાદ સર્જાયો હતો. માલધારી મહાપંચાયત દ્વારા તેમનો વિરોધ કરવામાં આવ્યો હતો. માલધારી મહાપંચાયતના પ્રવક્તા નાગજી દેસાઈએ જણાવ્યું હતું કે, 'કથાકાર રમેશભાઈ ઓઝાએ માલધારી સમાજ વિરુદ્ધ જે ઉચ્ચારણો અને જે ભાષા-શબ્દનો ઉપયોગ કર્યો છે, તે કથાકાર તરીકે અને ધાર્મિક સંત તરીકે દુર્ભાગ્ય પણ ગણી શકાય. આવા કથાકારો અને સંતોને કારણે 98 ટકા સારા સંતો અને કથાકારોને નીચું જોવું પડે છે. વ્યાસપીઠ ઉપરથી માલધારી સમાજને ઠપકો આપ્યો, વ્યાસપીઠની ગરીમા જ તેમને ખબર નથી કે તેની કેટલી મોટી ગરીમા છે.'