દાદાગીરી / નરોડાના કોર્પોરેટરની મહિલા ડૉક્ટર સાથે ગેરવર્તણૂંક, જબરદસ્તી મોઢું પકડી પાણી પીવડાવ્યાનો આરોપ

• અમદાવાદમાં નરોડાના કોર્પોરેટરની ખુલ્લેઆમ દાદાગીરી!
• નરોડા પોલીસ સ્ટેશનમાં મહિલા ડૉ. દ્વારા ફરિયાદ
• કોર્પોરેટરે મારી સાથે અણછાજતું વર્તન કર્યું -મહિલા ડોકટર 

રાજ્યમાં અનેક વાર કોઇ નેતા, ધારાસભ્ય કે કોર્પોરેટરની દાદાગીરીના વીડિયો વાયરલ થતા હોય છે. ત્યારે અમદાવાદમાં વધુ એક કોર્પોરેટરની દાદાગીરી સામે આવી છે. શહેરના નરોડાના કોર્પોરેટર સોમા પટેલની દાદાગીરીને લઇને ફરિયાદ કરવામાં આવી છે.

કોર્પોરેટર પર મેડિકલ ઓફિસરને મોઢું પકડી પાણી પીવડાવ્યાનો આરોપ

કોર્પોરેટર સોમા પટેલે મહિલા ડૉક્ટર સાથે દાદાગીરી કરી હોવાનું જાણવા મળી રહ્યું છે. ત્યારે આ મામલે UHC સેન્ટરના મહિલા કર્મચારી સાથે ગેરવર્તન કર્યાની ફરિયાદ પણ કરવામાં આવી છે. કોર્પોરેટર પર મેડિકલ ઓફિસરને મોઢું પકડી પાણી પીવડાવ્યાનો આરોપ લગાવવામાં આવ્યો છે.

મારું મોઢું દબાવીને મને પાણી પીવડાવ્યું: મહિલા ડૉક્ટર
 
આ મુદ્દે પીડિત મહિલા ડૉક્ટરે VTV સાથે વાતચીત પણ કરી હતી. ત્યારે મહિલા ડૉક્ટરે જણાવ્યું હતું કે, 'કોર્પોરેટર દ્વારા મારી સાથે અણછાજતું વર્તન કર્યું છે. તેમના સબંધી અહીં સારવાર માટે આવ્યા હતા. ત્યારે સ્ટાફે તેમના સંબંધીની સારવાર કરી હતી છતાં અમારી સાથે તેમણે ઝઘડો કર્યો. મારું મોઢું દબાવીને મને પાણી પીવડાવ્યું. ધમકી પણ આપી કે આ વાત અહીં જ દબાઈ દેજે. કોર્પોરેટર સોમાભાઈ પટેલ અને તેમના કાર્યકરો અહીં આવ્યા હતા. આથી કોર્પોરેટર રાજીનામું આપે અને તેમની પર પોલીસ કાર્યવાહી થાય તેવી મારી માંગ છે.' મહત્વનું છે કે, કોર્પોરેટરની દાદાગીરીને લઇ મહિલા ડૉક્ટરે કોર્પોરેટર સામે નરોડા પોલીસ સ્ટેશનમાં ફરિયાદ પણ કરી છે. તેમજ UHC સેન્ટર ખાતે હેલ્થ કર્મચારીઓએ કોર્પોરેટરનો ઉગ્ર વિરોધ કર્યો હતો.

કોર્પોરેટરે આગળ કોઈને ફરિયાદ નહીં કરવાની પણ આપી હતી ધમકી!

તમને વિશેષમાં જણાવી દઇએ કે, નરોડા ભાજપના કોર્પોરેટર વિપુલ ચીનુભાઈ પટેલ ઉર્ફે સોમાભાઈએ નરોડાના કોમ્યુનિટી હેલ્થ સેન્ટર ખાતે મહિલા મડેકિલ ઓફિસર સાથે ગેરવર્તણૂંક કરી હોવાની પોલીસ ફરિયાદ નોંધાઇ છે. સોમાભાઈએ મહિલા ડૉક્ટરને મોઢું પકડી જબરદસ્તી પાણી પીવડાવ્યું હતું અને આગળ કોઈને ફરિયાદ નહીં કરવાની પણ ધમકી આપી હતી.