રાજ્યની જીવા દોરી સમાન નર્મદા ડેમમાં હાલ પાણીની સતત આવક જોવા મળી રહી છે. જો કે હાલ નર્મદા ડેમની જળસપાટી 138.31 મીટરે પહોંચી છે. જ્યારે બીજી તરફ તાપીના ઉકાઇ ડેમમાં પણ પાણીની આવક થતાં સપાટીમાં વધારો થયો છે. જેને લઇને ડેમની સપાટી 343.16 ફૂટ પર પહોંચી છે.
નર્મદા ડેમમાં 2 લાખ 70 હજાર ક્યુસેક પાણીની આવક
23 દરવાજા ખોલીને નદીમાં પાણી છોડાઈ રહ્યું છે
ઉકાઈડેમની સપાટી વધીને 343.16 ફૂટને પાર
નર્મદા ડેમની જળસપાટી 138.31 મીટરે પર સ્થિર
નર્મદા ડેમમાં પાણીની સતત આવક ચાલું છે. હાલ નર્મદા ડેમની જળસપાટી 138.31 મીટરે પહોંચી છે. નર્મદા નિગમ 138 મીટરની સપાટી જાળવી રહ્યું છે. નર્મદા ડેમમાં હાલ 2 લાખ 70 હજાર ક્યુસેક પાણીની આવક છે. જ્યારે 23 દરવાજા ખોલી અને 2 લાખ 60 હજાર ક્યુસેક નર્મદા નદીમાં છોડાઇ રહ્યું છે. કેવડિયાનો ગોરા બ્રિજ 10 દિવસે પાણીથી બહાર આવ્યો છે. હાલ નર્મદા ડેમમાં 5578 mcm લાઈવ સ્ટોરેજ પાણી નો જથ્થો છે.
તાપીની ઉકાઈ ડેમમાં પાણીની આવક થતા સપાટીમાં વધારો
તાપીના ઉકાઈ ડેમમાં સતત પાણીની આવક થતાં સપાટીમાં વધારો થયો છે. ડેમમાં 91 હજાર 243 ક્યુસેક પાણીની આવક થઈ રહી છે. પાણીની આવક થતાં ડેમની સપાટી વધીને 343.16 ફૂટ પર પહોંચી છે. આ ડેમની ભયજનક સપાટી 345 ફૂટ છે. હાલમાં ડેમની સપાટી ભયજનક સપાટીથી માત્ર 2 ફૂટ દુર છે. ડેમના 8 ગેટ ખોલીને તાપી નદીમાં પાણી છોડવામાં આવી રહ્યુ છે. હાલમાં ડેમમાંથી 91 હજાર 243 ક્યુસેક પાણી છોડવામાં આવી રહ્યું છે.