2018માં વિશ્વકપ જીતનારી ભારતીય ક્રિકેટ ટીમના ગુજરાતી ખેલાડી નરેશ ટુમડા હાલ મંજૂરી કામ કરી પોતાનું ગુજરાન ચલાવી રહ્યા છે
દેશ માટે 2018માં વિશ્વકપ જીત્યો
ભારતનો આ ખેલાડી કરે છે મજૂરી
કડિયાકામ કરી ચલાવે છે ગુજરાન
ઓલિમ્પિકમાં ભારતે શ્રેષ્ઠ પ્રદર્શન કરી 7 મેડલ જીત્યા. મેડલવીરોનું દિલ્લી એરપોર્ટ પર ધમાકેદાર સ્વાગત કરવામાં આવ્યું. મેડલવીરો પર ઈનામોનો વરસાદ કરવામાં આવ્યો. કોઈએ સરકારી નોકરીઓની ઓફર કરી તો કોઈએ કરોડોની રોકડની જાહેરાત કરી. ખેલાડીઓએ દેશનું માથુ ગૌરવથી ઉંચુ કરી દીધું છે. સમગ્ર દેશમાં હાલ ઉત્સાહનો માહોલ છે. કંઈક આવો જ માહોલ વર્ષ 2018માં હતો. જ્યારે ભારતીય બ્લાઈન્ડ ક્રિકેટ ટીમે વિશ્વકપ જીત્યો હતો. અને તેમાં પણ ફાઈનલમાં ભારતીય ખેલાડીઓએ પાકિસ્તાનને હરાવ્યું હતું. એરપોર્ટ પર ધમાકેદાર સ્વાગત કરાયું હતું. નેતાઓએ અભિનંદનનો વરસાદ કર્યો હતો. પરંતુ વિજેતા ટીમનો એક સભ્ય અને આપણો ગુજરાતી હાલ ખુબ જ મોટા સંકટમાંથી પસાર થઈ રહ્યો છે. જેણે દેશને વિશ્વકપ અપાવ્યો તે હાથમાં પાવડો પકડી રહ્યો છે.
....વેપારીઓનું રાજ્ય કહેવાતા આપણા ગુજરાત રમત ગમત પ્રત્યે આપણે કેટલા સજાગ અને ગંભીર છે. તેનું આ જીવતું જાગતું ઉદાહરણ છે. આ યુવાન જે મજૂરી કામ કરી રહ્યો છે. હાથમાં તબડકા ઉપાડી કડિયા કામ કરી રહ્યો છે. પહેલી નજરે તો તમને આ સામાન્ય વ્યક્તિ લાગતો હશે. પણ કોઈ સામાન્ય નહીં પરંતુ આ એક મોટો બ્લાઈન્ડ ક્રિકેટર છે. અને 2018માં ભારતે પાકિસ્તાનને હરાવી વર્લ્ડકપ જીત્યો તેનો સભ્ય છે. જ્યારે 2018માં ભારતીય ટીમ વિજેતા બની ત્યારે તો આખા દેશમાંથી અભિનંદનનો વરસાદ થયો હતો. દેશના રાષ્ટ્રપતિથી લઈ પ્રધાનમંત્રીએ અભિનંદનનો વરસાદ કર્યો હતો. રાષ્ટ્રપતિએ તો આખી ટીમ સાથે મુલાકાત કરી હતી. તો આખા દેશમાં ઉજવણી થઈ હતી...તમામ ખેલાડીઓ પર દેશવાસીઓને ગૌરવ થયું હતું.
2018માં વિશ્વકપ જીતનારી ભારતીય ક્રિકેટ ટીમના સભ્ય નરેશ ટુમડા હાલ મંજૂરી કામ કરી પોતાનું ગુજરાન ચલાવી રહ્યા છે. જેણે દેશવતીથી રમીને દેશ માટે વિશ્વકપ જીત્યો હતો તે ખેલાડી આજે હાથમાં તગારુ પકડી મજૂરી કરી રહ્યો છે. 2018માં જે હાથમાં વિશ્વકપ હતો તેજ હાથમાં હાલ પાવડો છે. આજ આપણી ખેલાડીઓ માટેની નીતિ છે...સરકાર આશા બહુ મોટી રાખે છે કે ખેલાડીઓ પદક લાવે. પણ જો આવી જ સરકારની નીતિ હોય તો કયા મા-બાપ પોતાના સંતાનને ખેલાડી બનાવવા માગશે?
...આપણે ઓલિમ્પિકમાં જોયું કે આ વખતે આપણે ઐતિહાસિક પ્રદર્શન કરતા 7 મેડલ જીત્યા. આ 7 મેડલમાં એકલા ત્રણ મેડલ તો હરિયાણામાંથી આવતા ખેલાડીઓ લાવ્યા. તો મહિલા હોકીમાં ચોથા નંબરે રહેનારી ભારતીય ટીમમાં 9 ખેલાડીઓ હરિયાણાના હતા. હવે આ તમામ ખેલાડીઓને હરિયાણા સરકારે શું આપ્યું તે પણ જાણી લો. તો ગોલ્ડ મેડલ લાવનારા નીરજ ચોપરાને 6 કરોડ અને ક્લાવ વનની નોકરી, સિલ્વર મેડલ લાવનારા રવિ દહિયાને 5 કરોડ અને સરકારી નોકરી. તો બજરંગ પુનિયાને પણ અઢી કરોડ રૂપિયાનું ઈનામ આપવાની જાહેરાત કરી છે. એટલું જ નહીં મહિલા હોકી ટીમની 9 સભ્યને પણ 50-50 લાખ આપ્યા.
આ સિવાય તમામના કોચને પણ લાખોના ઈનામ આપ્યા. આપણે ઘણીવાર વાતો કરીએ છીએ કે હરિયાણામાંથી આવતા ખેલાડીઓ દરેક રમતમાં આગળ હોય છે અને ગુજરાતના ખેલાડીઓ ક્યાંય જોવા નથી મળતા. તો ગુજરાત સરકાર પોતાના ખેલાડીઓ પ્રત્યે જો ધ્યાન જ ન આપે. તો ક્યાંથી ગુજરાતીઓ રમત ગમતમાં આગળ વધે? શું નરેશ ટુમડાએ ક્રિકેટની પસંદગી પાવડા પકડવા માટે કરી હશે?..આ ગુજરાત સરકારે વિચારવા જેવો સવાલ છે. પરંતુ હવે આશા રાખીએ કે રમત ગમત પ્રત્યે સરકાર સજાગ બને અને નરેશ તુમડાને યોગ્ય રોજગારી પુરી પાડે. પરંતુ એ જોવાનું રહેશે કે વીટીવીના આ અહેવાલ બાદ સરકાર ક્યારે જાગે છે.