ખોડલધામના પ્રમુખ અને પાટીદાર અગ્રણી નરેશ પટેલના ગુજરાતના સક્રિય રાજનીતિમાં પ્રવેશના સંકેતથી રાજકારણમાં ગરમાવો ફેલાયો છે ત્યારે કોંગ્રેસના યુવા નેતા હાર્દિક પટેલ આ મામલે મહત્વનું નિવેદન આપ્યું છે.
નરેશ પટેલે રાજકારણમાં જોડાવાના આપ્યા સંકેત
કોંગ્રેસ અને ભાજપના નેતાએ આપી પ્રતિક્રિયા
કહ્યું- કયા પક્ષમાં જોડાવું તે તેમની અંગત બાબત
ગુજરાત કોંગ્રેસના કાર્યકારી અધ્યક્ષ હાર્દિક પટેલે મીડિયા સાથેની વાતચીત દરમિયાન જણાવ્યું હતું કે, નરેશ પટેલ કોઈપણ રાજકીય પાર્ટીમાં જોડાવા માટે સ્વતંત્ર છે, છેલ્લા કેટલાય સમયથી સૌરાષ્ટ્રમાં સમાજ ઉત્થાન માટે કેટલાય મહત્વના કાર્યો કર્યા છે અને તેઓ સમાજસેવી ઉપરાંત લોકોનું ભલુ ઈચ્છનાર વ્યક્તિ છે.
..તો કોંગ્રેસ તેમના માટે લાલ જાજમ પાથરશે
આ સાથે જ હાર્દિક પટેલે વધુમાં કહ્યું કે, હું ઈચ્છું કે તેઓ રાજકારણમાં આવીને સમાજના લોકોનું સારું જ ઈચ્છવા માગતા હોય તો દરવાજા ખુલ્લા છે. વાત રહી કોંગ્રેસ પાર્ટીની તો 2 દિવસ પહેલા અને ગઈકાલે પણ નવનિયુક્ત પ્રદેશ પ્રમુખે જણાવ્યું હતું કે, નરેશ ભાઈ કોંગ્રેસ સાથે જોડાઈને લોકોની સેવાનું બીડું ઉપાડવું હોય તે પાર્ટી તેમનું લાલજાજમ પાથરીને સ્વાગત કરશે.
રાહુલ સાથેની મુલાકાત અંગે આપ્યું નિવેદન
રાહુલ ગાંધી અને અશોક ગેહલોતની નરેશ પટેલની મુલાકાત અંગે હાર્દિકે જણાવ્યું હતું કે, આ મુલાકાત અંગે મને કોઈ જ જાણકારી નથી અને કદાચ મુલાકાત લીધી પણ હશે તો ખોટું શું છે.
ભાજપની પ્રતિક્રિયા
નરેશ પટેલની રાજનીતિમાં એન્ટ્રીના સંકેતને લઈને ભાજપના મીડિયા કન્વીનર યજ્ઞેશ દવેએ મહત્વનું નિવેદન આપતા કહ્યું કે, સામાજિક નેતા સમાજના ભલા માટે રાજકીય ક્ષેત્રે આવતા હોય છે. તેમના સંકેતોથી કે રાજનીતિ પ્રવેશથી સમાજને પણ ફાયદો થતો હોય છે. નરેશ પટેલ કયા પક્ષ સાથે જોડાય અને ક્યારે જોડાએ તે તેમનું અંગત મંતવ્ય છે. આ બાબતે ભારતીય જનતા પાર્ટી કોઈ જ ટિપ્પણી કરવા માગતી નથી.
સુખરામ રાઠવાએ પણ કોંગ્રેસમાં જોડાવા આપ્યું છે આમંત્રણ
નરેશ પટેલને કોંગ્રેસ તરફથી આમંત્રણ અપાયું છે. વિપક્ષના નવનિયુક્ત નેતા સુખરામ રાઠવાએ નરેશ પટેલને કોંગ્રેસમાં જોડાવાનું આમંત્રણ આપ્યું છે. સુખરામ રાઠવાએ કહ્યું કે નરેશભાઇ ખોડલધામના પ્રમુખ અને પટેલ સમાજના અગ્રણી છે. હું નરેશ પટેલને સારી રીતે ઓળખું છું. નરેશ પટેલ કોંગ્રેસમાં આવવા માગે છે તો તેમનું સ્વાગત છે. નરેશભાઇને અમે આવકારીશું. નરેશ પટેલને રાજકારણમાં આવવું કે નહીં તેમનો નિર્ણય. અમે ઇચ્છીએ છે કે નરેશ પટેલ કોંગ્રેસમાં જોડાય. નરેશ પટેલ આવે તો અમને ફાયદો થશે.
મુખ્યમંત્રી ભૂપેન્દ્ર પટેલ સાથે આજે
ગાંધીનગર ખાતે આજે સાંજે 6.30 કલાકે યોજાનારી બેઠક પહેલા પાટીદાર નેતા નરેશ પટેલે આડકતરી રીતે રાજનીતિમાં જવાના સંકેત આપતા ગુજરાતના રાજકારણમાં ગરમાવો જોવા મળ્યો હતો. તેમણે જણાવ્યું હતું કે, ભાજપ અને કોંગ્રેસ બંને બોલાવી રહ્યા છે પરંતુ હાલ રાજકરણમાં જવાનો મારો કોઇ વિચાર નથી. જો કે, સમાજ જો આદેશ કરશે તો મારે રાજકરણમાં આવવું પડશે.
ગાંધીનગર ખાતેની બેઠક પહેલા રાજકારણ ગરમાયું
પાટીદાર અગ્રણીઓની આજે સાંજે બેઠક મળવાની છે, જેને લઈને ગુજરાતના રાજકારણમાં ગરમાવો જોવા મળ્યો હતો. નરેશ પટેલ મીડિયા સાથેની વાતચીતમાં જણાવ્યું હતું કે, ખોડલધામ, ઉમિયાધામ અને આંદોલનના નેતાઓ આજે રાજ્યના મુખ્યમંત્રી સાથે બેઠક કરવાના છે. જેમાં આંદોલનના સમયના બાકી રહેલા પ્રશ્નોની તથા પાટીદાર સમાજના સામે કરાયેલ કેસો ફરી પાછા લેવા મામલે ચર્ચા કરવામાં આવશે. આ બેઠકમાં નરેશ પટેલ,અલ્પેશ કથીરિયા, દિનેશ બાંભણિયા સહિતના અગ્રણીઓ હાજર રહેશે.
રાજકારણમાં જવાના આપ્યા સંકેત
પત્રકાર પરિષદને સંબોધન કરતા પાટીદાર આગેવાન નરેશ પટેલે રાજકારણમાં જવા અંગે નિવેદન આપતા કહ્યું હતું કે, રાજકારણમાં જવું કે નહીં તે મારો સમાજ નક્કી કરશે. નેતાઓનું કામ તો અમને મૂંઝવણમાં નાંખવાનું હોય છે. સાથે જ તેમણે કહ્યું કે, પરિસ્થિતિના આધારે મંત્રી, મુખ્યમંત્રી બનતા હોય છે, મુદ્દા આધારીત રાજકારણ થાય તેની ચિંતા કરે છે ખોડલધામ.
ભરતસિંહ સાથેની મુલાકાત અંગે આપ્યું નિવેદન
કોંગ્રેસના પીઢ નેતા ભરતસિંહ સોલંકી સાથે તાજેતરમાં જ થયેલી મુલાકાત અંગે નરેશ પટેલે જણાવ્યું હતું કે, અમારી પ્રવૃત્તિઓ જોઇને ભરતસિંહને થયું હોય કે હું સન્માન માટે હકદાર છું
ખોડલધામના પટાંગણમાં મળેલી આ બેઠક રાજકીય રીતે મહત્વની
ગુજરાત વિધાનસભાની સમયાવધી પ્રમાણે આગામી ડીસેમ્બરમાં ગુજરાત વિધાનસભા 2022ની ચૂંટણી છે ત્યારે, તમામ રાજનીતિક પક્ષો પોતાના ચોગઠા ગોઠવી રહ્યા છે. એવામાં ભરતસિંહની મુલાકાત સૂચક માનવામાં આવી રહી છે. જ્યાં તેઓએ પાટીદાર સમાજના અગ્રણી અને ખોડલ ધામના ચેરમેન નરેશ પટેલ સહિત અન્ય મહાનુભાવો સાથે મુલાકાત કરી બેઠક કરી હતી.
અગાઉ શું કહ્યું હતું નરેશ પટેલે ?
ઉલ્લેખનીય છે કે,ખોડલ ધામના ટ્રસ્ટી નરેશ પટેલે છ -સાત મહિના પહેલા ગુજરાત વિધાનસભાની 2022ની ચૂંટણીને લઈને ગુજરાતના મુખ્યમંત્રી પાટીદાર હોવા જોઈએ તેવી તીવ્ર લાગણી અને સુચિતાર્થ માંગણી કરી હતી. ધાર્મિક સ્થળેથી રાજનીતિક નિવેદનને લઈને ત્યારે ભારે-તર્ક વિતર્ક થયા હતા.ત્યાર બાદ રાજ્યમાં તખ્ત પલટાયો અને ગુજરાતને ભુપેન્દ્ર પટેલના રૂપમાં પાટીદાર મુખ્યમંત્રી મળ્યા છે.
અગાઉ પાટીલે પણ કરી હતી મુલાકાત
થોડા દિવસ પહેલા જ સૌરાષ્ટ્રમાં વધી રહેલા જૂથવાદને ખતમ કરવા માટે સી.આર.પાટીલ સૌરાષ્ટ્રના પ્રવાસે પહોંચ્યા હતા..આ દરમિયાન તેમણે ખોડલખામના પ્રમુખ નરેશ પટેલ સાથે બંધ બારણે મુલાકાત કરી હતી.. જે બાદ પાટીદારોને મનાવવાના પ્રયાસો થતા હોવાની ચર્ચા પણ શરૂ થઈ હતી.. અને ભાજપે પાટીદારો સામેના કેસો પરત ખેંચવાની જાહેરાત કરી હતી. તેવામાં હવે કાોંગ્રેસ નેતા ભરતસિંહ સોલંકીએ નરેશ પટેલ સાથે બંધ બારણે બેઠક યોજી વધુ એક વખત રાજકીય ચર્ચાઓને વેગ આપ્યો છે.
ભરતસિંહ સોલંકીની નરેશ પટેલ સાથેની આ મુલાકાત એટલા માટે ચર્ચાનો વિષય બની છે કારણ કે, શુક્રવારે જ કોંગ્રેસે જગદીશ ઠાકોરને પ્રદેશ અધ્યક્ષ બનાવ્યા. અને સુખરામ રાઠવાને વિપક્ષ નેતા..આમ કાોંગ્રેસે ઓબીસી અને એસટી વોટબેંકને પોતાના તરફી કરવાનો દાવ ખેલ્યો. અને હવે બીજા જ દિવસે ભરતસિંહ સોલંકી નરેશ પટેલ સાથે બંધ બારણે બેઠક માટે ખોડલધામ પહોંચી ગયા હતા.. એટલું જ નહીં આ બેઠકથી ગીતા પટેલ અને મહેશ રાજપૂત સહિતના કાોંગ્રેસના નેતાઓને પણ દૂર રાખવામાં આવ્યા. ત્યારે ચોક્કસ પણે આ બેઠક 2022ની ચૂંટણીને લઈને પાટીદાર મતોને કાોંગ્રેસ તરફી લાવવા માટેનો પ્રયાસ હતો.
અહીં આપણે એવાત પણ ન ભૂલી શકીએ કો, ગત ઓગસ્ટ મહિનામાં ખોડલ ધામથી એવી લાગણી અને માગણી વ્યક્ત કરાઈ હતી કે, 2022ની ચૂંટણી બાદ ગુજરાતના મુખ્યમંત્રી પાટીદાર જ હોય. અને ત્રણ જ મહિનામાં તેની અસર જોવા મળી. પાટીદાર સમાજનો સરદાર ધામ કાર્યક્રમ રૂપાણી સરકારનો આખરી જાહેર કાર્યક્રમ બની ગયો. તેવામાં સી.આર.પાટીલ બાદ ભરતસિંહ સોલંકીની ખોડલધામ મુલાકાત અનેક તકા વિતર્કો સર્જાયા છે. ત્યારે જોવાનું એ રહેશે કે, ભરતસિંહ સોલંકીની આ મુલાકાત ગુજરાતની ત્રીજી સૌથી મોટી જ્ઞાતિના મત કોંગ્રેસ તરફી લાવી શકશે. કે, પછી ભાજપ મુખ્યમંત્રીના નામે બાજી મારે છે..