પુરષ્કાર / ‘અભિયાન’ મેગેજીનના પત્રકાર નરેશ મકવાણાને પ્રથમ ‘કાંતિ ભટ્ટ પત્રકાર પારિતોષિક’ એનાયત

બને છે એવું કે એક દિવસ સુરેન્દ્રનગરના લખતરના બે ખેડૂતો ‘અભિયાન’ની ઓફિસે આવી પહોંચે છે અને પત્રકાર નરેશ મકવાણાને રજૂઆત કરે છે કે અમારા ગામ અને આજુબાજુનાં ગામમાં જળ માફિયાઓ ગેરકાયદે રીતે ખેડૂતોને નર્મદા કેનાલમાંથી પાણીનાં કનેક્શન આપે છે અને દર વર્ષે ભારે રકમ પડાવે છે. અમે વિરોધ કરીએ તો માર મારે છે. નરેશે માલવણ, ખેરવા સહિતનાં ગામોમાં જઈને જોયું તો કેનાલો તોડીને પ્રાઇવેટ તળાવો બનાવેલાં જોવા મળ્યાં. આ પાણી ચોરીના અપરાધમાં ભૂ માફિયાઓ સાથે નર્મદા કેનાલના એન્જિનિયરો અને પોલીસની પણ સંડોવણી હતી. પોલીસે જ ભૂ માફિયાને મારવાની ટેકનિક શિખવી હતી કે સામે અવાજ ઉઠાવે તેને ઘૂંટણ નીચે મારવા. જેથી અમે તમારા ઉપર હળવી કલમો લગાવીને તુરંત જામીન આપી દઇશું, ભૂ માફિયાઓ સામે અવાજ ઉઠાવનારાને આજીવન વિકલાંગ બની જાય તેવી રીતે હાથ પગ તોડી નાખતા હતા અને માર મારતો કોમેન્ટ્રી સાથેનો વીડિયો બનાવીને તેને પ્રસારિત કરતા હતા.

નરેશ મકવાણા કહે છે કે, ધારાસભ્ય નૌશાદ સોલંકીએ ટ્વિટર ઉપર મુખ્યપ્રધાન વિજય રૂપાણી અને નાયબ મુખ્યપ્રધાન નીતિન પટેલને ટેગ કરીને ‘અભિયાન’ની સ્ટોરી મૂકી હતી. જેના જવાબમાં નીતિન પટેલે કાર્યવાહી કરવાનું આશ્વાસન આપ્યું હતું.  આ એવોર્ડનાં સિલેક્શનની બીજી એક વિશેષતા એ છે કે એવોર્ડ માટે શીલા ભટ્ટના કહેવા પ્રમાણે ૮૦ કરતાં વધુ એન્ટ્રી આવી હતી. નરેશ મકવાણાએ એવોર્ડ માટે પોતાની સ્ટોરી મોકલી નહોતી, એન્ટ્રી નોંધાવી નહોતી. છતાં એવોર્ડ માટે તેમની પસંદગી કરવામાં આવી છે.