PM મોદી આજે દમણના મહેમાન વિવિધ વિકાસ કાર્યોનું કરશે લોકાર્પણ

પ્રધાનમંત્રી નરેન્દ્ર મોદી આજે 24મી ફેબ્રુઆરીના રોજ રાજ્યના પડોશના સંઘ પ્રદેશ દમણમાં આવી રહ્યાં છે. PM બન્યા બાદ મોદી પ્રથમ વખત દમણ આવી રહ્યાં હોવાથી પ્રદેશનું પ્રશાસન અને લોકો પ્રધાનમંત્રીને આવકારવા થનગની રહ્યાં છે. 

PMને આવકારવા અને સ્વાગત માટે દમણને દુલ્હનની જેમ શણગારવામાં આવી રહ્યું છે. મહત્વપૂર્ણ છે કે દમણની મુલાકાત વખતે પ્રધાનમંત્રી નરેન્દ્ર મોદીના હસ્તે દમણ અને દીવ વચ્ચેની હેલિકોપ્ટર સેવાનો આરંભ કરવામાં આવશે.આ હેલીકોપ્ટર સેવા શરૂ થયા બાદ દમણથી દીવ હેલિકોપ્ટર દ્વારા માત્ર એક કલાકમાં જ પહોંચી શકાશે. એક હજાર કરોડથી પણ વધુના 31 જેટલા વિકાસના કામોનું લોકાર્પણ અને ખાતમુહર્ત થશે. પ્રશાસન દ્વારા આ અંગે તડામાર તૈયારીઓ ચાલી રહી છે.   

આપને જણાવી દઇએ કે વડાપ્રધાનની આ મુલાકાતને લઈ પૂરા પ્રદેશમાં સુરક્ષા બંદોબસ્ત ગોઠવી દેવામાં આવ્યો છે.ત્યારે નાનકડા દમણમાં વડાપ્રધાન મુલાકાતને લઇને ભાજપ અને સ્થાનિક અગ્રણીઓ તેમજ અપક્ષ જિલ્લા પંચાયત પણ મોદીની સભાને સફળ બનાવવા એકસાથે ઉત્સાહ થી જોતરાઈ ગયા છે.