અમદાવાદ / મેડિકલના વિદ્યાર્થીઓ આનંદો.! નરેન્દ્ર મોદી મેડિકલ કોલેજને 185 પીજી સીટની મંજૂરી મળી, સજાર્યો આ રેકોર્ડ

• વર્ષ 2023-24માં કુલ 135 સીટની માન્યતા મળી
• નરેન્દ્ર મોદી મેડિકલ કોલેજ વર્ષ 2009થી કાર્યરત છે
• એમડી/એમએસના કોર્સનો પ્રારંભ વર્ષ 2015-16થી કરાયો

અમદાવાદ મ્યુનિસિપલ કોર્પોરેશન મેડિકલ એજ્યુકેશન ટ્રસ્ટ દ્વારા સંચાલિત નરેન્દ્ર મોદી મેડિકલ કોલેજને વર્ષ ર૦ર૩-ર૪માં કુલ 185 પીજી સીટની મંજૂરી અપાઈ છે, જે સાત વર્ષના ટૂંકા ગાળામાં કોઈ મેડિકલ કોલેજને 185 પીજી સીટની મંજૂરી મળી હોય તેનો આ એક રેકોર્ડ છે. આ અંગે વધુ વિગત આપતાં મ્યુનિસિપલ હોસ્પિટલ કમિટીના ચેરમેન પરેશ પટેલ વધુમાં કહે છે કે નરેન્દ્ર મોદી મેડિકલ કોલેજ સંલગ્ન શેઠ એલજી જનરલ હોસ્પિટલ કે જે અમદાવાદની નામાંકિત હોસ્પિટલ પૈકીની 1200 બેડ ધરાવતી હોસ્પિટલ છે, જ્યાં જુદા જુદા ડિપાર્ટમેન્ટની દરરોજની ઓપીડી કેજ્યુલિટીમાં આશરે 3500થી વધુ દર્દીને સારવાર આપવામાં આવે છે.

નરેન્દ્ર મોદી મેડિકલ કોલેજ વર્ષ 2009થી કાર્યરત
મેડિકલ એજ્યુકેશન ટ્રસ્ટ સંચાલિત નરેન્દ્ર મોદી મેડિકલ કોલેજ વર્ષ 2009થી કાર્યરત છે. નરેન્દ્ર મોદી મેડિકલ કોલેજ ખાતે એમબીબીએસના કોર્સની વર્ષ 2009થી 150 સીટની મેડિકલ કાઉન્સિલ ઓફ ઈન્ડિયા તરફથી મંજૂરી મળી હતી. ત્યાર બાદ કોલેજ ઓથોરિટીના અથાગ પ્રયત્નોથી વર્ષ 2019-20માં વધુ 50 એમબીબીએસ સીટની મંજૂરી મળી હતી. અત્યારે એમબીબીએસના કોર્સની 200 સીટની નેશનલ કાઉન્સિલ ઓફ ઈન્ડિયાની મંજૂરી મળી છે.

185 પીજી સીટની મંજૂરી મળી
નરેન્દ્ર મોદી મેડિકલ કોલેજ ખાતે એમડી/એમએસના કોર્સનો પ્રારંભ વર્ષ 2015-16થી કરાયો હતો, જેમાં વખતોવખત સીટનો વધારો થતાં વર્ષ 2023-24માં કુલ 185 પીજી સીટની મંજૂરી મળી હોવાનું મ્યુનિ. હોસ્પિટલ કમિટીના ચેરમેન પરેશ પટેલ વધુમાં જણાવે છે. વર્ષ 2012માં પેરામેડિકલ કોર્સમાં મેડિકલ લેબોરેટરી ટેકનિશિયનની 30 સીટ તથા વર્ષ 2017માં રેડિયોગ્રાફી ટેકનિશિયનની 20 સીટની શરૂઆત નરેન્દ્ર મોદી મેડિકલ કોલેજમાં કરાઈ હતી. હોસ્પિટલમાં ઓપીડી-ઈન્ડોર દર્દીઓની સંખ્યામાં ઉત્તરોત્તર મોટા પ્રમાણમાં વધારો થતાં કોલેજ ખાતે નવા મેડિકલ કોર્સ શરૂ કરવા માટે ગુજરાત યુનિવર્સિટી ખાતે દરખાસ્ત કરવામાં આવી હતી. ગુજરાત યુનિવર્સિટીએ આ દરખાસ્તને માન્ય રાખતાં કોલેજ ખાતે ઈ.સી.જી./ટી.એમ.ટી./હોલ્ટર આસિસ્ટન્ટની 10 સીટ, ઈકો કાર્ડિગ્રામ આસિસ્ટન્ટની પાંચ સીટ, એક્સ-રે આસિસ્ટન્ટની 10 સીટ, ઓપરેશન થિયેટર ટેકનિશિયનની 15 સીટ અને એનેસ્થેશિયા આસિસ્ટન્ટની 15 સીટની માન્યતા વર્ષ 2023-24થી આપવામાં આવી છે અને હયાત મેડિકલ લેબોરેટરી ટેકનિશિયનના કોર્સમાં 30 સીટનો વધારો કરી કુલ 60 સીટનો અભ્યાસક્રમ રાખવાની મંજૂરી પણ અપાઈ છે. દરમિયાન વર્ષ 2012માં 30 સીટથી શરૂ થયેલા પેરામેડિકલ કોર્સમાં વર્ષ 2023-24માં કુલ 135 સીટ માટે ગુજરાત યુનિવર્સિટીએ આપી છે તેમ નરેન્દ્ર મોદી મેડિકલ કોલેજના ડીન ડો. દીપ્તિ એમ. શાહ જણાવે છે.