ગાંધીનગર / કોંગ્રેસનો આક્ષેપ: વિદ્યાર્થીઓ પાસેથી પૈસા ઉઘરાવ્યા પણ NAMO ટેબલેટ કેમ ન આપ્યા? સરકારે આપ્યો વિચિત્ર જવાબ...

• સરકારનો આ કેવો વહીવટ ?
• રૂપિયા ઉઘરાવ્યા ટેબલેટ ન આપ્યા !
• સરકારે રજૂ કર્યો જવાબ

કોલેજના પ્રથમ વર્ષમાં અભ્યાસ કરતા વિદ્યાર્થીઓને 1 હજાર રૂપિયામાં ટેબલેટ આપવાની સરકારની યોજના છે. ત્યારે હવે પૈસાની ઉઘરાણી બાદ સરકારે અડધોઅડધ વિદ્યાર્થીઓને ટેબલેટ ન આપ્યા હોવાના આક્ષેપો લાગ્યા છે. જે મામલે રાજ્ય સરકારનું કહેવું છે કે, લેનેવો કંપની પાસેથી જ મોબાઈલ નથી મળ્યા.

રાજ્ય સરકારે જવાબ આપતા કહ્યું કે, કંપનીને પ્રતિ ટેબલેટ દીઠ 6 હજાર 667 રૂપિયા ચુકવાઈ ગયા છે. કંપની પાસેથી સરકારને 80 હજાર ટેબલેટ લેવાના બાકી છે. સરકારે કુલ 3 લાખ 9 હજાર 651 વિદ્યાર્થીઓ પાસેથી રૂપિયા ઉઘરાવ્યા છે. જેમાંથી 1 લાખ 58 હજાર 866 વિદ્યાર્થીઓને ટેબલેટ ન મળ્યાનો દાવો કરાયો છે.

નમો ટેબલેટની ખરીદીમાં સરકાર પર કોંગ્રેસના ગંભીર આક્ષેપ

બીજી તરફ ટેબલેટ મુદ્દે કોંગ્રેસે સરકાર પર ગંભીર આરોપ લગાવ્યા છે. સરકારે મંગાવેલા ટેબલેટ અલીબાબા વેબસાઈટ પર સસ્તા મળતા હોવાનો દાવો કર્યો છે. કોંગ્રેસનું કહેવું છે કે, જો એક સાથે 500 ટેબલેટ ઓર્ડર કરીએ તો તે ટેબલેટ માત્ર 1 હજાર 408 રૂપિયામાં મળે છે.

સાથે જ સરકાર પર સવાલ ઉઠાવ્યા છે કે, ટેબલેટ આટલા સસ્તા મળે છે તો પછી સરકાર શા માટે ટેબલેટના 5 હજાર રૂપિયા વધુ ચુકવી રહી છે. ઉલ્લેખનીય છે કે, સરકારે લેનેવો કંપનીને ત્રણ લાખ ટેબલેટ માટે કુલ 150 કરોડથી વધુ રૂપિયા ચુકવ્યા છે. મહત્વનું છે કે આ મામલે પરેશ ધાનાણીએ પ્રેસ કોન્ફરન્સ કરીને પણ સરકાર પર આક્ષેપો કર્યા હતા.