કોરોનાકાળમાં લોકોની સેવા કરવી ખૂબ જ સારી બાબત છે, જો કે, આ કામનો માત્ર પ્રચાર જ કરો તે ખરેખર ખોટી વાત છે.
ભાજપના નમો ઓક્સિજન બુસ્ટરથી સર્જાયો વિવાદ
સુરતના ભાજપ નેતાએ ઓક્સિજન બુસ્ટર પર લગાવ્યા PM મોદીનો ફોટો
વિપક્ષે કર્યા આકરા પ્રહાર
મળતી જાણકારી પ્રમાણે, સુરતના વોર્ડ નંબર 18ના ભાજપના કાર્પોરેટર દિનેશ રાજપુરોહિત સેવાની સાથે પોતાનો પ્રચાર પણ કરી રહ્યા છે.
ભાજપના નમો ઓક્સિજન બુસ્ટર
હવે સુરતમાં ભાજપ દ્વારા નમો ઓક્સિજન બુસ્ટર તૈયાર કરવામાં આવ્યા છે. આ ઓક્સિજન બુસ્ટર જરૂરીયાતમંદ લોકોને આપવામાં આવી રહ્યા છે. પરંતુ તેના વિતરણની સાથે-સાથે પ્રચાર પણ જોરશોરથી કરવામાં આવી રહ્યો છે.
પેકિંગ પર PM મોદીની અને અન્ય નેતાઓની તસવીર
ઉલ્લેખનીય છે કે, ઓક્સિજન બુસ્ટરના પેકિંગ પર નજર કરીએ તો વચ્ચોવચ પ્રધાનમંત્રી નરેન્દ્ર મોદીની તસવીર છે, તેમની સાથે જ રાજ્યના મુખ્યમંત્રી વિજય રૂપાણી પણ છે. તો ગુજરાત ભાજપના પ્રદેશ અધ્યક્ષ સી.આર પાટીલ અને નાયબ મુખ્યમંત્રી નીતિન પટેલ અને સુરતના લિંબાયતના ધારાસભ્ય સંગીતા પાટિલની પણ તસવીર પણ છપાયેલી છે.
વિપક્ષે કર્યા પ્રહાર
ઓક્સિજન બુસ્ટર બનાવવામાં અજમો અને લવિંગના મિશ્રણનો ઉપયોગ કરવામાં આવ્યો છે. આ પ્રકારના ઓછામાં ઓછા 10 હજાર બુસ્ટર બનાવવામાં આવ્યા છે જેનું લોકોમાં મફતમાં વિતરણ કરાશે.
અત્યાર સુધીમાં 8 હજાર બુસ્ટર તૈયાર
અત્યાર સુધીમાં 8 હજાર જેટલા બુસ્ટર તૈયાર થઈ ચૂક્યા છે. પરંતુ તેમ છતાં લોકોના મનમાં સવાલ ઉઠી રહ્યા છે. જેમની નજરોમાં આ ઓક્સિજન બુસ્ટર કમ પ્રચાર બુસ્ટર વધુ લાગી રહ્યા છે. જેને પગલે વિપક્ષ દ્વારા ભાજપ અને સરકાર પર આકરા પ્રહારો કરવામાં આવ્યા હતા.