બજેટ સત્ર / મુખ્યમંત્રીએ કહ્યું નમસ્તે ટ્રમ્પ પાછળ 100 કરોડ નહીં આટલો ખર્ચ કર્યો, કોંગ્રેસના આક્ષેપ ખોટાં

• નમસ્તે ટ્રમ્પ કાર્યક્રમમાં ખર્ચ મુદ્દે મુખ્યમંત્રીએ કર્યો ખુલાસો 
• વિધાનસભા ગૃહમાં મુખ્યમંત્રીએ કર્યો ખુલાસો
• કોંગ્રેસના 100 કરોડના આક્ષેપ પાયા વિહોણા 

ગુજરાત વિધાનસભામાં ચાલી રહેલ બજેટ સત્રનો આજે ત્રીજો દિવસ છે ત્યારે પ્રશ્નોત્તરી દરમિયાન મુખ્યમંત્રી વિજય રૂપાણીએ નમસ્તે ટ્રમ્પના કાર્યક્રમમાં ખર્ચ મુદ્દે ખુલાસો કર્યો છે. મુખ્યમંત્રીએ કોંગ્રેસના 100 કરોડ ખર્ચના આક્ષેપને પાયા વિહોણા ગણાવ્યા છે. મુખ્યમંત્રીએ જણાવ્યું કે નમસ્તે ટ્રમ્પ કાર્યક્રમમાં કુલ 8 કરોડનો ખર્ચ થયો છે. જેમાં અમદાવાદ મનપાએ 4 કરોડનો ખર્ચ કર્યો છે અને રાજ્ય સરકારે 4 કરોડનો ખર્ચ કર્યો છે. 

ડોનાલ્ડ ટ્રમ્પના આગમન પહેલા અમદાવાદને દુલ્હનની જેમ સજાવાયું હતું, સ્ટેડિયમ આસપાસના રોડ-રસ્તા નવા બનાવી દેવાયા હતા, ઝૂપડીપટ્ટીઓ બહાર દિવાલો ચણી લેવાઇ, બ્રીજ પર સીરીઝ લગાવી દેવાઇ, સ્ટેડિયમનું મોટાભાગનું કામ તાબડતોબ પૂર્ણ કરી દેવાયું, પોલીસ કર્મચારીઓનો કાફલો ખડકી દેવાયો હતો. આમંત્રિત મહેમાનોના ટ્રાંસપોટેશન પાછળ ખર્ચ કરાયો હતો. મોટેરા સ્ટેડિયમ ખાતે નમસ્તે કાર્યક્રમ યોજાયો હતો. ડોનાલ્ડ ટ્રમ્પ અંદાજિત સાડા ત્રણ કલાક સુધી અમદાવાદમાં રહ્યા હતા. 

મહત્વનું છે કે, ટ્રમ્પની અમદાવાદ મુલાકાતને લઇને ગુજરાતનું બજેટ બે દિવસ મોડું રજૂ કરાયું હતું. ત્યારે ટ્રમ્પના કાર્યક્રમ પાછળ કરવામાં આવેલ ખર્ચ અંગેના કોંગ્રેસના આક્ષેપોને મુખ્યમંત્રીએ ફગાવ્યા છે.

અમેરિકન રાષ્ટ્રપતિ ડોનાલ્ડ ટ્રમ્પ અને મેલેનિયા ટ્રમ્પ અમેરિકાથી સીધા અમદાવાદ આવ્યા હતા. આ દરમિયાન તેમણે 22 કિમી. લાંબો રોડ શો યોજ્યો હતો. સાબરમતી આશ્રમની મુલાકાત લીધી હતી. બાદમાં તેઓ વિશ્વના સૌથી મોટો મોટેરા સ્ટેડિયમ પહોંચ્યા હતા. જ્યાં તેમણે નમસ્તે કાર્યક્રમમાં હાજરી આપી હતી. બાદમાં તેઓ આગ્રા જવા રવાના થયા હતા. તેમણે બે દિવસ ભારતની મુલાકાત લીધી હતી.