અમેરિકાના રાષ્ટ્ર પ્રમુખ ડોનાલ્ડ ટ્રમ્પ આગામી તા.24 ફેબ્રુઆરીએ અમદાવાદની મુલાકાતે આવશે. આ દરમિયાન તેઓ મોટેરા સ્ટેડિયમનું લોકાર્પણ કરશે તેમજ વડાપ્રધાન નરેન્દ્ર મોદીની હાજરીમાં 'નમસ્તે ટ્રમ્પ' કાર્યક્રમ યોજાશે. આ કાર્યક્રમ દરમ્યાન સ્ટેડિયમમાં આશરે સવા લાખ લોકો હાજર રહી તેનો આનંદ માણશે. દરમ્યાન આટલી મોટી સંખ્યામાં લોકો હાજર રહેનાર હોઇ મ્યુનિસિપલ કોર્પોરેશન દ્વારા મોટેરા સ્ટેડિયમની અંદર મેઇન ગેટ પાસે મિની હોસ્પિટલ તૈયાર કરવાની દિશામાં ચક્રો ગતિમાન કરાયાં છે. આ હોસ્પિટલ 22મી ફેબ્રુઆરી સુધીમાં તૈયાર થઇ જશે.
મોટેરા સ્ટેડિયમના મેઈન ગેટ પાસે મિની હોસ્પિટલ ઊભી કરાશે
એક મોટા રૂમમાં 25 પથારીની વ્યવસ્થા ધરાવતી મિની હોસ્પિટલ
રોડ શોમાં ડોક્ટર સહિતની મેડિકલ ટીમ ખડે પગે રહેશે
મોટેરા સ્ટેડિયમમાં 'નમસ્તે ટ્રમ્પ' કાર્યક્રમ માટે મ્યુનિ. કોર્પોરેશનના સત્તાવાળા દ્વારા તડામાર તૈયારી ચાલી રહી છે. મોટેરા સ્ટેડિયમમાં લોકોને પીવાનું પાણી પૂરું પાડવા તંત્રએ 70થી વધુ કાઉન્ટર ઊભાં કર્યાં છે. સ્ટેડિયમના તમામ દરવાજે પાણીની વ્યવસ્થા રખાઇ છે. આ ઉપરાંત તંત્રે મોટેરા સ્ટેડિયમમાં મિની હોસ્પિટલ તૈયાર કરવા હિલચાલ આરંભી છે.
મિની હોસ્પિટલમાં 100 ડૉક્ટર અને 81 મેડિકલ ટીમ તૈનાત કરાશે
મ્યુનિ. હેલ્થ વિભાગના ઇન્ચાર્જ વડા ડૉ. ભાવિન સોલંકીને આ અંગે પૂછતા તેઓ કહે છે મોટેરા સ્ટેડિયમમાં મેઇન ગેટ પાસે એક મોટા રૂમમાં 25 પથારીની વ્યવસ્થા ધરાવતી મિની હોસ્પિટલ તૈયાર થઇ રહી છે. આ હોસ્પિટલ 22મી ફેબ્રુઆરીની સવારથી તૈયાર થઇ જશે અને તા.23 અને 24 સુધી લોકો માટે ધમધમતી રહેશે. મિની હોસ્પિટલમાં 100 ડૉક્ટર સહિત 22 કિ.મી.ના રોડ શો માટે 81 મેડિકલ ટીમ તૈનાત કરાશે. આ મિની હોસ્પિટલમાં લોકોની નાની-મોટી સારવાર માટે તમામ દવાનો સ્ટોક તેમજ ગ્લુકોઝ વગેરેની પૂરતી વ્યવસ્થા રખાશે.
સાવચેતીના ભાગરૂપે બનશે હોસ્પિટલ
શહેરમાં ગરમીના કારણે ડીહાઇડ્રેશનથી રોડ શો વખતે લોકોને ઝાડા-ઊલટી, ગભરામણ કે બેહોશી જેવી શારીરિક તકલીફ વેઠવી પડે તેવી શક્યતા હોઇ તંત્રએ મિની હોસ્પિટલ તેમજ રોડ શો દરમ્યાન મેડિકલ ટીમ સહિતની તૈયારી રાખી છે.