રાજકોટ / OLX પરથી બાઈક ખરીદીને આંગડિયા પેઢીની બહાર રેકી કરીને ચોરી કરતી નાયડુ ગેંગ ઝડપાઈ

• રાજકોટમાંથી આંતરરાજ્ય નાયડુ ગેંગનો થયો પર્દાફાશ
• 3 લાખના મુદ્દામાલ સાથે ગેંગની ધરપકડ કરવામાં આવી
• બેંક અને આંગડિયા પેઢીની બહાર રેકી કરીને ચોરી કરતા હતા

રાજકોટ રુલર પોલીસે આંતરરાજ્ય નાયડુ ગેંગને પકડી પાડી છે. નાયડુ ગેંગ ગુજરાત ઉપરાંત મહારાષ્ટ્ર, કર્ણાટક અને રાજસ્થાનના જિલ્લામાં બેંક-આંગડિયા પેઢી બહાર રેકી કરતા હતા. જે બાદ લોકોની નજર ચૂકવી ચોરી કરી નાસી જતી હતી. અત્યાર સુધીમાં આ ગેંગ દ્વારા લાખો રૂપિયા રકમની ચોરીને અંજામ આપ્યો હોવાનું પોલીસ તપાસમાં સામે આવ્યું છે. 

નાયડુ ગેંગના શખ્સોએ તેમના એક સગીર સાગરીત સાથે મળી વર્ષ 2020ના અંતમાં શાપર વેરાવળ વિસ્તારમાં ચોરીના ગુનાને અંજામ આપ્યો હતો. ફરી એક વખત રાજકોટ વિસ્તારમાં ચોરી કરવા આવતા હોવાની બાતમીને આધારે પોલીસે વોચ ગોઠવી દીધી હતી. જે બાદ નાયડુ ગેંગના 4 શખ્સને પકડી પાડ્યા છે. પોલીસે આ શખ્સો પાસેથી પલ્સર બાઈક અને રોકડ રકમ સહિત કુલ 3 લાખ 26 હજારનો મુદ્દામાલ કબજે કર્યો છે.

પોલીસના નિવેદન મુજબ આરોપીઓની ઓળખ નાયડુ ગેંગના નામે થાય છે. અને તેઓ બેંક તથા આંગડિયા પેઢી બહાર રેકી કરી લોકોની નજર ચૂકવી ચોરીને અંજામ આપતા હતા. આરોપીઓ કોઈ પણ જિલ્લામાં પ્રવેશ કર્યા બાદ મકાન ભાડે રાખી અને નકલી ડોક્યુમેન્ટ રજૂ કરતા હતા. જે બાદ OLX એપ્લિકેશન પરથી બાઈક ખરીદીને ખરીદી કરતા હતા. અને નક્કી કરેલા સ્થળ પર રેકી કરી અને ચોરીના ગુનાને અંજામ આપતા હતા. આ ટોળકીએ ગુજરાતના રાજકોટ, અમદાવાદ, સુરેન્દ્રનગર, જામનગર ઉપરાંત, રાજસ્થાન, મહારાષ્ટ્ર અને કર્ણાટક રાજ્યમાં અલગ અલગ 11 ચોરીને અંજામ આપ્યો હોવાનું સામે આવ્યું છે.