પ્રતિબંધ હટાવ્યો / સરકારના નિર્ણયને હાઈકોર્ટે ફગાવી દીધો, આ રાજ્યમાં હવે કૂતરનાનું માંસ વેચી શકાશે

• નાગાલેન્ડ સરકારે કૂતરાના માંસના વેચાણ પર પ્રતિબંધ મૂક્યો હતો
• આ મામલે હવે ગૌહાટી હાઈકોર્ટે મોટો ચુકાદો આપીને તેને રદ્દ કરી દીધો 
• કાયદાકીય સમર્થન વગર કૂતરાનાં માંસ પર પ્રતિબંધ મૂકી શકાય નહીં

નાગાલેન્ડ સરકારે ત્રણ વર્ષ પહેલા રાજ્યમાં કૂતરાના માંસના વેચાણ પર પ્રતિબંધ મૂક્યો હતો. આ મામલે હવે ગૌહાટી હાઈકોર્ટે મોટો ચુકાદો આપીને તેને રદ્દ કરી દીધો છે. વર્ષ 2020 માં નાગાલેન્ડ સરકારે કૂતરાઓની વ્યાવસાયિક આયાત, ખરીદી અને વેચાણ અને કૂતરાના માંસના વેચાણ પર સંપૂર્ણ પ્રતિબંધ મૂક્યો હતો. ઉપરાંત,રેસ્ટોરાંમાં તેને સર્વ કરવા પર પ્રતિબંધ હતો.

કૂતરા અને તેમના માંસના વેપાર પર પ્રતિબંધ મૂકવામાં આવ્યો હતો

એક વેબસાઈટના અહેવાલ મુજબ ગયા શુક્રવારે ગુહાટી હાઈકોર્ટની કોહિમા બેંચના જસ્ટિસ મેર્લી વાંકુંગની બેંચે નાગાલેન્ડ સરકારના નિર્ણયને ફગાવી દીધો હતો અને કહ્યું હતું કે કોઈપણ કાયદાકીય સમર્થન વિના તે કૂતરાનાં માંસ પર પ્રતિબંધ મૂકી શકે નહીં. 4 જુલાઈ, 2020 ના રોજ નાગાલેન્ડ કેબિનેટની બેઠક પછી એક સૂચના દ્વારા કૂતરા અને તેમના માંસના વેપાર પર પ્રતિબંધ મૂકવામાં આવ્યો હતો.

કોર્ટે નિર્ણયને રદ કર્યો હતો

આ મામલે હવે બેન્ચે કહ્યું કે, નાગાલેન્ડ સરકારે વિધાનસભા દ્વારા કોઈ કાયદો પસાર કર્યા વિના કૂતરાના માંસ પર પ્રતિબંધ મૂક્યો હતો. તેમના દ્વારા લાવવામાં આવેલ કેબિનેટ નોટિફિકેશનની કોઈ કાનૂની માન્યતા નથી. તેથી તે રદ કરવામાં આવે છે. હાઈકોર્ટ દ્વારા એવી દલીલ કરવામાં આવી છે કે સરકાર ફૂડ સેફ્ટી એન્ડ સ્ટાન્ડર્ડ એક્ટ હેઠળ નોટિફિકેશન લાવવાની વાત કરી રહી છે. આ કાયદામાં ક્યાંય એવું લખ્યું નથી કે સરકારને આ રીતે નોટિફિકેશન દ્વારા કૂતરાના માંસ પર પ્રતિબંધ મૂકવાનો અધિકાર છે.