US Open / નડાલ પાંચમી વાર US ઓપનની ફાઇનલમાંઃ રશિયાના ડેનિલ મેદવેદેવ સામે ટકરાશે

સ્પેનનો દિગ્ગજ ટેનિસ સ્ટાર રાફેલ નડાલ વર્ષની ચોથી અને અંતિમ ગ્રાન્ડ સ્લેમ ટૂર્નામેન્ટ યુએસ ઓપનની ફાઇનલમાં પહોંચી ગયો છે. સેમિફાઇનલમાં તેણે ઈટાલીના માતેઓ બેરેતિનીને હરાવી દીધો. નડાલ પોતાની ૧૯ વર્ષની કરિયરમાં પાંચમી વાર યુએસ ઓપનની ફાઇનલમાં પહોંચ્યો છે. 

ફાઇનલમાં તેનો મુકાબલો રશિયાના ડેનિલ મેદવેદેવ સામે થશે. ૨૩ વર્ષીય મેદવેદેવ પોતાની કરિયરમાં પ્રથમ વાર કોઈ ગ્રાન્ડસ્લેમ ટૂર્નામેન્ટની ફાઇનલમાં પહોંચ્યો છે.
૩૩ વર્ષીય નડાલે અત્યાર સુધીમાં કુલ ૧૮ ગ્રાન્ડસ્લેમ ખિતાબ જીત્યા છે. રોજર ફેડરરે પુરુષ સિંગલ્સમાં સૌથી વધુ ૨૦ ગ્રાન્ડસ્લેમ ખિતાબ જીત્યા છે. જો નડાલ આવતી કાલે રમાનારો ફાઇનલ મુકાબલો જીતી લેશે તો તેના નામે ૧૯ ગ્રાન્ડસ્લેમ થઈ જશે. આવું થવા પર તેની પાસે આગામી વર્ષે ફેડરરના રેકોર્ડ ૨૦ ગ્રાન્ડસ્લેમ ખિતાબની બરોબરી કરવાની તક હશે.

વિશ્વમાં બીજા ક્રમાંકિત નડાલે સેમિફાઇનલમાં એ જ શાનદાર ફોર્મ દેખાડ્યું હતું, જે સમગ્ર ટૂર્નામેન્ટમાં દેખાડતો આવ્યો છે. તેના આ ફોર્મ સામે ૨૪મો ક્રમાંકિત માતેઓ બેરેતિની અઢી કલાક પણ ટકી શક્યો નહોતો. નડાલે આ મેચ સીધા સેટોમાં ૭-૬ (૮-૬), ૬-૪, ૬-૧થી જીતી લીધી હતી.

આ પહેલાં પાંચમા ક્રમાંકિત ડેનિલ મેદવેદેવે બલ્ગેરિયાના ગ્રિગોર દિમિત્રોવને હરાવીને ફાઇનલમાં પ્રવેશ મેળવી લીધો હતો. રશિયાના મેદવેદેવે સીધા સેટોમાં જીત મેળવી હતી. તેણે બિનક્રમાંકિત દિમિત્રોવને ૭-૬ (૭-૫), ૬-૪, ૬-૩થી માત આપી હતી.