હુમલો / બે બહેનો ઘરમાં એકલી હતી ત્યારે છ શખસો તલવાર લઈને ઘૂસી ગયા

શહેરના અસારવા વિસ્તારમાં આવેલ જોગણી માતાના ચોક પાસે રહેતી બે બહેનો પર મોડી રાતે પાડોશમાં રહેતા છ શખ્સોએ અંગત અદાવતમાં તલવાર લઈને ઘરમાં ઘૂસી તોડફોડ કરી આતંક મચાવ્યો હતો. તલવાર લઈને ઘરમાં ઘૂસેલા શખ્સોથી બે બહેનો ડરી જતાં તે ત્યાંથી ભાગી ગયાં હતાં અને આ છ શખ્સો ઘરમાં રહેલ ટીવી-ફ્રીઝ સહિતની અન્ય ચીજવસ્તુઓની તોડફોડ કરી  અને કરિયાણાની દુકાનમાં રહેલ સામાન વેરવિખેર કરી તથા પૈસાની લૂંટ કરીને નાસી ગયા હતા. આ ઘટનાની જાણ થતાં પોલીસે છ શખ્સો સામે ગુનો નોંધી તપાસ હાથ ધરી છે.

 અસારવા વિસ્તારમાં આવેલ જોગણી માતાના ચોક પાસે રહેતી પાયલ પટણીએ છ શખ્સો વિરુદ્ધમાં શાહીબાગ પોલીસ સ્ટેશનમાં ફરિયાદ નોંધાવી છે. ફરિયાદમાં જણાવ્યા મુજબ બે દિવસ પહેલાં ઘરની બહાર માતાજીનાં નેજા નીકળ્યાં હતાં ત્યારે પાડોશમાં રહેતા દિનેશભાઇ પટણીએ રિક્ષા પાર્ક કરવા બાબતે ઝઘડો કર્યો હતો.

આ અંગે પાયલબહેનની મોટી બહેન કાજલે  દિનેશભાઇ પટણી સામે ફરિયાદ કરી હતી ત્યારે ગઈ કાલે રાત્રે પાયલબહેન અને તેમના કાકાની દીકરી રેખાબહેન બન્ને ઘરમાં એકલાં હતાં તે સમયે અંગત અદાવત રાખીને ભૂ‌િરયો પટણી, કારિયો પટણી, અશોક પટણી, રાકેશ પટણી, રાજુ પટણી, સંજય પટણી હાથમાં તલવાર-ડંડા અને બેટ લઈને ઘરમાં ઘૂસી જતાં પાયલ અને રેખાબહેન એકદમ ડરી જતાં ઘરમાંથી ભાગી જઈને ક્યાંક સંતાઈ ગયા બાદ છ શખ્સો ઘરમાંથી નીકળી ગયા હતા. 

આરોપીઓ જતા રહ્યા બાદ પાયલ અને રેખાએ ઘરે આવીને જોયું તો બધો સામાન વેરવિખર હતો. ઘરમાં ઘૂસેલા શખ્સોએ ટીવી, ફ્રીઝ સ‌િહત અન્ય ચીજવસ્તુની તોડફોડ કરી હતી એટલું જ નહીં, કરિયાણાની દુકાનનો સામાન પણ વેરવિખેર કરી દીધો હતો અને કરિયાણાની દુકાનના ડ્રોઅરમાં રહેલા પૈસા લૂંટી તેઓ લઈને ભાગી ગયા હતા. ત્યારબાદ પાયલ અને રેખા બન્નેએ શાહીબાગ પોલીસ સ્ટેશન પહોંચીને છ શખ્સ વિરુદ્ધમાં ફરિયાદ કરી છે અને પોલીસે ગુનો નોંધીને તપાસ શરૂ કરી છે.