અજબ ગજબ / ભારતના આ ગામમાં જૂતાં-ચંપલ પહેરવા પર છે પ્રતિબંધ, રહસ્ય જાણીને વિચારમાં પડી જશો

• ભારતના આ ગામમાં લોકો બુટ-ચંપલ પહેરતા નથી
• તામિલનાડુના પ્રસિદ્ધ શહેર મદુરાઈથી 20 કિમી દૂર આવેલું છે આ ગામ
• બુટ-ચંપલ ના પહેરવા પાછળ આ અજીબ પરંપરા છે જવાબદાર

દક્ષિણ ભારતમાં આવેલું છે આ ગામ

ભારતમાં એક એવુ ગામ છે, આ ગામમાં બુટ-ચંપલ પહેરવાનું સંપૂર્ણ રીતે પ્રતિબંધ છે. આ જાણીને કદાચ તમને વિશ્વાસ આવ્યો નહીં હોય. પરંતુ આ સાચી વાત છે. આ ગામ દક્ષિણ ભારતના રાજ્ય તામિલનાડુમાં આવેલુ છે. તામિલનાડુના પ્રસિદ્ધ શહેર મદુરાઈથી 20 કિમી દૂર કલિમાયન ગામ છે. આ ગામના લોકો પોતાના બાળકોને પણ બુટ-ચંપલ પહેરવા દેતા નથી. જો આ ગામમાં કોઈ ભૂલથી પણ બુટ અથવા ચંપલ પહેરી લે તો તેને આકરી સજા આપવામાં આવે છે. 

ગામના લોકો બુટ-ચંપલ કેમ નથી પહેરતા?

જણાવવામાં આવે છે કે આ ગામના લોકો અપાચી નામના દેવની સદીઓથી પૂજા કરી રહ્યાં છે. તેઓ માને છે કે અપાચી દેવ તેમની સુરક્ષા કરે છે. પોતાના દેવો પ્રત્યે આસ્થાને કારણે ગામની અંદર બુટ-ચંપલ પહેરવાની મનાઈ છે. તમને જાણીને આશ્ચર્ય થશે. પરંતુ આ ગામમાં રહેતા લોકો સદીઓથી આ અજીબ પરંપરાને નિભાવી રહ્યાં છે. જો કોઈને બહાર જવાનુ થાય તો તેઓ હાથમાં બુટ-ચંપલ લઇને જાય છે અને ગામની સરહદ વટ્યા બાદ બુટ-ચંપલ પહેરે છે. ત્યારબાદ જ્યારે તેઓ બહારથી પાછા પોતાના ગામમાં આવે છે ત્યારે ગામની અંદર પ્રવેશ કરતા પહેલાં જ બુટ-ચંપલ ઉતારી નાખે છે.

કેટલીય પેઢીઓથી ચાલે છે આ પરંપરા

આ પરંપરા ક્યારથી ચાલે છેતે અંગે કોઈને સચોટ માહિતી નથી. પરંતુ લોકોનુ માનવુ છે કે કેટલીય પેઢીઓથી આ ગામના લોકો આ અજીબ પરંપરાને નિભાવી રહ્યાં છે. અહીંના બાળકો પણ શાળાએ બુટ-ચંપલ પહેર્યા વગર જાય છે. કલિમાયન ગામના લોકો બુટ-ચંપલના નામથી ગુસ્સે થઇ જાય છે. ઉલ્લેખનીય છે કે, ભારતમાં ઘણી એવી અજીબ પરંપરાઓ છે, જેનું લોકો પાલન કરી રહ્યાં છે.