શામળાજીમાં આ ભેદી ધડાકામાં જાનહાનિના સમાચાર મળ્યાં છે જેમાં એક યુવકનું મોત થવાનું જાણવા મળ્યું છે. જ્યારે 2 બાળકીઓ સહિત એક મહિલા પણ ઈજાગ્રસ્ત થઈ છે. જેથી આ ઘટનામાં એકનું મોત અને ત્રણ ગંભીર રીતે ઘાયલ થયા હોવાનું જાણવા મળી રહ્યું છે.
શામળાજીના ગોઢકુલ્લા ગામે રહેણાંક મકાનમાં ભેદી બ્લાસ્ટનો મામલે ઈન્ચાર્જ SP બી.બી.બસિયા, LCB, SOGની ટીમ ઘટનાસ્થળે પહોંચી તપાસ હાથ ધરી છે, યુવાનના મોત બાદ લોકોના ટોળા ઘટનાસ્થળે પહોંચ્યા છે. બ્લાસ્ટમાં બે બાળકી ગંભીર રીતે ઘાયલ થઈ હતી જે બાદ પ્રાથમિક સારવાર માટે તેમને શામલાજીની હોસ્પિટલમાં રીફર કરાઇ હતી, પણ ત્યાં બાળકીઓની તબિયત વધુ લથડતા બંને બાળકીઓને અમદાવાદ રિફર કરવામાં આવી છે.
તેમજ ધડાકામાં ઇજાગ્રસ્ત મહિલા શામળાજી સરકારી હોસ્પિટલમાં સારવાર હેઠળ રખાઇ છે. બ્લાસ્ટના ચોક્કસ કારણ અંગે FSLની ટીમ હાલ તપાસ કામગીરીમાં જોતરાઈ છે. હાલ આટલો મોટો ધડાકો કયા કારણસર થયો તેની કોઈ વિગત સામે આવી નથી
હાલમાં આ ઘટનાને પગલે પોલીસ ઘટનાસ્થળે પહોંચી ગઈ છે અને વધુ તપાસ હાથ ધરી છે. પ્રાથમિક ધોરણે પણ હજુ સુધી આ અકસ્માતને લઈને કોઈ પણ કારણ જાણવા મળ્યું નથી.