બોલિવૂડની ફેમસ મ્યુઝિક કમ્પોઝર જોડી સાજિદ-વાજિદમાંથી વાજિદ ખાનનું 42 વર્ષની વયે દુઃખદ અવસાન થઈ ગયું છે. કિડનીની બીમારીથી પીડિત વાજિદ ખાનને કોરોનાનું સંક્રમણ થયું હોવાથી એક્ટરનું નિધન થયું હોવાના સમાચાર મળી રહ્યાં છે. રિપોર્ટ મુજબ, તેનું નિધન મલ્ટીપલ ઓર્ગન ફેલિયરને કારણે થયું છે. વાજિદના અચાનક દુનિયાને અલવિદા રહી દેવાથી સમગ્ર બોલિવૂડ જગત આઘાતમાં છે. ચાલો તમને જણાવીએ વાજિદથી જોડાયેલી ખાસ વાતો.
વાજિદે પોતાના ભાઈ સાજિદ ખાન સાથે મળીને 1998માં સલમાન ખાનની ફિલ્મ 'પ્યાર કિયા તો ડરના ક્યા'માં પહેલું મ્યુઝિક આપ્યું હતું. વાજિદે શરુઆતથી જ પોતાના ભાઈની સાથે જોડી જમાવી હતી. જેના કારણે બંનેને લોકો સાજિદ-વાજિદ તરીકે ઓળખે છે. ત્યારબાદ બંનેએ સોનૂ નિગમના આલ્બમ 'દીવાના' માટે મ્યુઝિક આપ્યું. આ આલ્બમના સોન્ગ દીવાના તેરા, અબ મુજે રાત દિન અને ઈસ કદર પ્યાર હૈ, મ્યુઝિક લવર્સ વચ્ચે ખૂબ પોપ્યુલર થયા હતા. વાજિદ ખાન પરિણીત હતો. તેની પત્નીનું નામ યાસ્મીન છે, તેને એક દીકરો અને દીકરી પણ છે.
સાજિદ અને વાજિદે મળીને સલમાન ખાનની લગભગ ઘણી ફિલ્મો માટે મ્યુઝિક બનાવ્યું છે. જેમાં પ્યાર કિયા તો ડરના ક્યા સિવાય હેલ્લો બ્રધર, ચોરી ચોરી, મુજસે શાદી કરોગી, પાર્ટનર, વોન્ટેડ, દબંગ 1, 2 અને 3, એક થા ટાઈગર જેવી ફિલ્મો સામેલ છે. વાજિદે 2008માં ફિલ્મ પાર્ટનર અને એક થા ટાઈગરમાં સોન્ગ પણ ગાયું હતું.
એટલું જ નહીં સલમાન ખાનના લેટેસ્ટ સોન્ગ 'પ્યાર કરોના' અને 'ભાઈ ભાઈ'ને પણ વાજિદ અને તેના ભાઈ સાજિદે કમ્પોઝ કર્યુ હતું. સલમાન ખાનની લાઈફમાં વાજિદ-સાજિદનું ખૂબ મહત્વ છે. લોકડાઉનમાં પણ વાજિદ ખાન એક્ટિવ થઈને કામ કરી રહ્યો હતો. સલમાન ખાનની ફિલ્મોમાં મ્યૂઝિક કમ્પોઝ કરવા સિવાય વાજિદ ખાને સિંગર જાવેદ અલી સાથે મળીને નવું આલ્બમ રિલીઝ કર્યું હતું.
આ સિવાય વાજિદે સિંગર તરીકે જોહ્ન અબ્રાહમની ફિલ્મ સત્યમેવ જયતે, કપિલ શર્માની કિસ કિસ કો પ્યાર કરૂ, ગ્રાન્ડ મસ્તી, હાઉસફુલ 2, ચશ્મે બદ્દૂર, સૈફ અલી ખાનની બુલેટ રાજા સહિત અન્ય ફિલ્મોમાં સોન્ગ ગાયા હતા. સાજિદ-વાજિદની જોડીએ બોલિવૂડમાં છેલ્લા 20 વર્ષમાં ઘણી ફિલ્મોમાં મ્યુઝિક આપ્યું છે. મ્યુઝિક કમ્પોઝ કરવાની સાથે વાજિદ અને સાજિદ ટીવીના સિંગિંગ રિયાલિટી ષોઝ પણ જજ કરી ચૂક્યા છે. તેમણે સા રે ગા મા પા સુપરસ્ટાર્સ અને સા રે ગા મા પા 2012માં પણ જજ તરીકે કામ કર્યું હતું.
તમને જણાવી દઈએ કે, સાજિદ-વાજિદે બિગ-બોસ 4 અને બિગ બોસ 6ના ટાઈટલ ટ્રેકને પણ કમ્પોઝ કર્યું હતું. સાથે જ આઈપીએલ 4ના થીમ સોન્ગ ધૂમ ધૂમ ધડાક પણ આ જ જોડીએ કમ્પોઝ કર્યું હતું અને આ સોન્ગ વાજિદે ગાયુ હતું.
તમને જણાવી દઈએ કે, 42 વર્ષીય વાજિદ ખાનને મુંબઇના ચેમ્બુરની એક હોસ્પિટલમાં દાખલ કરાયો હતો. થોડા મહિના પહેલા તેનું કિડની ટ્રાન્સપ્લાન્ટ કરવામાં આવ્યું હતું. પરંતુ તેની તબિયત સારી નહોતી. થોડા દિવસો પહેલા તપાસમાં કોરોના રીપોર્ટ પણ પોઝિટિવ આવ્યો હતો. રવિવારે તબિયત લથડતાં તેમને દાખલ કરાયા અને મોડી રાતે તેમનું ઈમ્યુનિટી લેવલ ઘટતાં તેમની કિડનીની સમસ્યા વધતાં નિધન થયું.