અજીબ ઘટના / મહિલા માલિકની રૅપ બાદ હત્યા : સાક્ષી તરીકે પોપટને કોર્ટમાં રજૂ કરાયો, ચોંકાવનારો કર્યો ઘટસ્ફોટ

દુષ્કર્મ કેસમાં પોપટ મુખ્ય સાક્ષી તરીકે

આર્જેન્ટિનામાં દુષ્કર્મ અને હત્યાના કેસમાં એક પોપટ મુખ્ય સાક્ષી તરીકે છે. પોપટની જુબાની પણ કોર્ટમાં લેવામાં આવી હતી અને તેના આધારે આરોપીને દોષિત ઠેરવી શકાય તેવી શક્યતા છે. 46 વર્ષીય એલિઝાબેથ ટોલેડોની દુષ્કર્મ બાદ હત્યા કરવામાં આવી હતી. આ ઘટના બની ત્યારે તેનો પોપટ ત્યાં હાજર હતો. તેથી, ફરિયાદીએ તેને મુખ્ય સાક્ષી તરીકે કોર્ટ સમક્ષ રજૂ કર્યો છે.

મહિલાનો મૃતદેહ ઘરમાંથી મળી આવ્યો હતો

'ધ સન'ના અહેવાલ મુજબ, એલિઝાબેથ ટોલેડો અન્ય બે લોકો સાથે ભાડાના મકાનમાં રહેતી હતી. પોલીસને એલિઝાબેથનો મૃતદેહ તેના ઘરમાં જ મળ્યો હતો. પોલીસને શંકા હતી કે મૃતકની સાથે રહેતા લોકોએ આ ઘટનાને અંજામ આપ્યો હશે. જોકે, તેમની પૂછપરછમાં ખાસ કંઈ માહિતી મળી નહીં. પરંતુ હવે પોપટની જુબાની ગુનેગારોને સજા અપાવી શકે છે. 

આ રીતે પોપટ સાક્ષી બન્યો

રિપોર્ટમાં જણાવાયું છે કે સ્થળ પર હાજર એક પોલીસકર્મીએ પોપટને કંઇક બોલતા સાંભળ્યો હતો. જે બાદ તેને લાગ્યું કે પોપટની જુબાની કેસને ફેરવી શકે છે. પોલીસે આર્જેન્ટિનાના સાન ઇસિડ્રોમાં કોર્ટને કહ્યું કે પોપટ બોલી રહ્યો હતો, તે કદાચ તેના માલિકના છેલ્લા શબ્દો હતા. પાડોશીઓએ પણ તેને 'નહીં, પ્લીઝ, મને જવા દો, તમે મને કેમ મારો છો' તેવું બોલતા પોપટને સાંભળ્યો હતો.