મ્યુનિસિપલ કોર્પોરેશન દ્વારા હવે ગીચ વિસ્તારમાં આગ બુઝાવવા માટે બે રોબોટનો ઉપયોગ કરાશે. મ્યુનિસિપલ ફાયર બ્રિગેડ દ્વારા સમગ્ર વિભાગને અપડેટ કરવા માટે રોબોટની ખરીદીનો નિર્ણય લેવાયો છે. તંત્ર દ્વારા અઢી કરોડના ખર્ચે બે રોબોટ ખરીદશે.
આગ બુઝાવવા માટે મનપા ખરીદશે રોબોટ
થર્મલ કેમેરાથી હશે સજ્જ
તંત્ર કરશે અઢી કરોડનો ખર્ચ
જાણકાર સૂત્રો કહે છે, આગની દુર્ઘટનામાં અંદર ફસાયેલા નાગરિકોને શોધી કાઢવા રોબોટમાં ખાસ પ્રકારના થર્મલ કેમેરા લગાવાયા છે. આ કેમેરાથી રોબોટને 500 મીટર દૂરથી રિમોટ દ્વારા હેન્ડલ કરનાર ફાયર બ્રિગેડના કર્મચારી આગમાં ફસાયેલ વ્યક્તિને ખોળી કાઢશે. અનેક કિસ્સામાં ઠરી ગયેલી આગ ફરી અંદર ચિનગારી હોય તો ભભૂકી ઊઠે છે, પરંતુ રોબોટના થર્મલ કેમેરાથી આ બાબતની જાણકારી મળી શકશે.
પ્રતિમિનિટ 1800 લિટર પાણી છોડીને આગ બુઝાવી શકશે
બેટરી ઓપરેટેડ રોબોટ ડીસી મોટરથી ઘાસ, ખાડા-ટેકરા, રસ્તાની કોઇ પણ પ્રકારની સ્થિતિને ન ગણકારતાં 30 ડિગ્રીના ચઢાણને પણ પ્રતિકલાકે 2.5 કિ.મી.ની ઝડપે ચઢી શકશે. એકધાર્યા ત્રણથી ચાર કલાક સુધી ફરજ બજાવવા સક્ષમ આ રોબોટ પ્રતિમિનિટ 1800 લિટર પાણી છોડીને આગ બુઝાવી શકશે. તંત્રના 10 કે 20 હજાર લિટર ક્ષમતાનાં ટેન્કર જોડે રોબોટનું પાઇપ દ્વારા જોડાણ કરાશે.
આગ બુઝાવતી વખતે રોબોટની આસપાસ પાણીનો ફુવારો થશે
વોટર મિલ્ટ સિસ્ટમ હેઠળ ભીષણ ગરમીના સ્થળે આગ બુઝાવતી વખતે રોબોટની આસપાસ પાણીનો ફુવારો થશે, જે રોબોટને 100 ડિગ્રીથી પણ વધુ તાપમાન વચ્ચે પણ પોતાની કામગીરી કરવામાં મદદરૂપ થશે.