નોટિફિકેશન / માર્ચ મહિનામાં ફરી જોવા મળશે ચૂંટણીનો માહોલ, રાજ્યસભા બાદ હવે ન.પા. અને તા.પં.ની પેટાચૂંટણી જાહેર

• 22 માર્ચના રોજ યોજાશે નગરપાલિકા-તાલુકા પંચાયતની પેટા ચૂંટણી
• 24 માર્ચના રોજ યોજાશે મતગણતરી 
• રાજ્યસભાની 4 બેઠકો માટે આગામી 26 માર્ચે ચૂંટણી

નગરપાલિકા અને તાલુકા પંચાયતની ખાલી પડેલી બેઠકો માટે આજે રાજ્યમાં ચૂંટણીપંચ દ્વારા ચૂંટણીની તારીખ જાહેર કરાઈ છે. 19 જિલ્લા પંચાયતની ખાલી પડેલી બેઠક માટે અને 17 તાલુકા પંચાયત માટે 22 માર્ચે ચૂંટણી યોજાશે. જ્યારે 24 માર્ચ મતગણતરી યોજાશે.

26 માર્ચના યોજાશે ગુજરાતમાં રાજ્યસભાની ચૂંટણી

રાજ્યસભાની 4 બેઠકો માટે આગામી 26 માર્ચે ચૂંટણી યોજાશે અને આ જ દિવસે ચૂંટણી બાદ મતગણતરી યોજાશે. એપ્રિલ મહિનામાં રાજ્યસભાની 55 બેઠકો ખાલી થઇ રહી છે. જેને લઇ 26 માર્ચે 7 રાજ્યોની 55 બેઠકો માટે ચૂંટણી યોજાશે. રાજ્યસભામાં ભાજપ અને કોંગ્રેસ બે-બે સીટ પર જીતી શકે છે. હાલ ભાજપ પાસે 103 ધારાસભ્ય અને કોંગ્રેસ પાસે 73 ધારાસભ્ય છે. જ્યારે બીટીપીના 2 અને એનસીપી-અપક્ષના એક-એક ધારાસભ્ય છે. ત્યારે સંખ્યા બળની દ્રષ્ટિએ ભાજપ 2, કોંગ્રેસ 1 સીટ પર મજબુત છે.

જો કે કોંગ્રેસ એડીચોટીનું જોર લગાવે તો બીજી સીટ પણ મેળવી શકે છે. જ્યારે ભાજપ તોડ-જોડના રસ્તે ત્રીજી સીટ પણ મેળવી શકે છે. એટલે કે આ વખતે પણ રાજ્યસભાની ચૂંટણી રસપ્રદ બનવાની શક્યતા છે. ગુજરાતમાં રાજ્યસભમાંથી જે સભ્યોની મુદત પૂરી થઇ રહી છે તેમાં ચુનીભાઇ ગોહેલ, લાલસિંહ વાડોદીયા, શંભુપ્રસાદ ટુંડિયા અને કોંગ્રેસના મધુસુદન મિસ્ત્રીનો સમાવેશ થાય છે.