અમદાવાદ / મિશન મિલિયન ટ્રી હેઠળ શહેરમાં 50 ટકા વવાશે લીમડા, તંત્રએ કમર કસી

નોંધનીય છે કે, ગત તા.પ જૂન ર૦૧૯ના વિશ્વ પર્યાવરણ દિવસે તંત્ર દ્વારા હાથ ધરાયેલ મિશન મિલિયન ટ્રીનું મુખ્યપ્રધાન વિજય રૂપાણીના હસ્તે પ્રારંભ કરાયો હતો. ર૦૧૧ પછી આટલું મોટું લક્ષ્યાંક નક્કી કરાયું છે. શહેરમાં અત્યારે ૪.૬૬ ટકા ગ્રીન કવર જે મિશન મિલિયન ટ્રીથી આગામી ત્રણ વર્ષમાં પ ટકા જેટલું વધશે તેવો તંત્રનો દાવો છે. મ્યુનિ. બાગ-બગીચા વિભાગના વડા જિજ્ઞેશ પટેલ મિશન મિલિયન ટ્રી હેઠળ શહેરમાં અત્યાર સુધી ઝોનવાઇઝ કરાયેલા વૃક્ષારોપણ અંગે માહિતી આપી હતી.

તેમણે માહિતી આપતા પશ્ચિમ ઝોનમાં સૌથી વધુ ૮૦,૮૭૯, ઉત્તર ઝોનમાં પ૪૪૯ર, ઉત્તર-પશ્ચિમ ઝોનમાં ૪પ,૦પપ, પૂર્વમાં ર૪,૧૧૬, દ‌િ‌ક્ષણ-પશ્ચિમ ઝોનમાં ૧૩,૬૧૩, જ્યારે મધ્ય ઝોનમાં સૌથી ઓછા ૩ર૩૪ વૃક્ષ મળીને કુલ ર,પપ,૪૧૯ વૃક્ષોનું રોપણ કરાયું છે. બીજી તરફ અમદાવાદનું હવામાન લીમડાનાં વાવેતર માટે વધુ અનુકૂળ છે તેમ જણાવતાં જિજ્ઞેશ પટેલ કહે છે. અત્યાર સુધીનાં વૃક્ષારોપણમાં સૌથી વધુ રોપા લીમડાના વવાયા છે. મિશન મિલિયન ટ્રી હેઠળ પ૦ ટકા વૃક્ષ લીમડાના જ વવાશે. એટલે શહેરમાં લીમડો જ છવાશે.

આ દરમિયાન જાણકાર સૂત્રો કહે છે મિશન મિલિયન ટ્રી હેઠળ આગામી ૩૦ સપ્ટેમ્બર સુધી વૃક્ષારોપણની ઝુંબેશ ચાલશે. જોકે અત્યાર સુધી ર.પપ લાખ જેટલા રોપાનું વાવેતર કરાયું હોઇ બાકીના દિવસોમાં ૭.૪પ લાખ જેટલા વૃક્ષોનું રોપણ શક્ય બનશે કે કેમ તે મોટો પ્રશ્ન છે. એટલે કે મિશન મિલિયન ટ્રી સામે જ પડકાર ઊભો થયો છે.

અત્રે ઉલ્લેખનીય છે કે, ગ્રીનસિટીની યાદીમાં અમદાવાદ રાજ્યના ભાવનગર, જૂનાગઢ અને જામનગર જેવાં નાનાં શહેરો કરતાં પાછળ છે. સ્વાભાવિક પણે રાજ્યનું પાટનગર ગાંધીનગર ગ્રીનસિટીની યાદીમાં પ૩.૦૯ ટકા ગ્રીન કવર સાથે અવ્વલ નંબરે છે. જ્યારે ભાવનગરમાં ર૧.૩પ ટકા, વડોદરામાં ૧૬.ર૯ ટકા, જૂનાગઢમાં ૪.૮૦ ટકા,જામનગરમાં ૪.૭૪ ટકા, રાજકોટમાં ૪.૬૯ ટકા અને અમદાવાદમાં ૪.૬૬ ટકા ગ્રીનકવર વર્ષ ર૦૧રની વૃક્ષોની ગણતરી મુજબ નોંધાયું હતું. જ્યારે અમદાવાદ કરતા સુરત હરિયાળી મામલે પાછળ છે. કેમ કે સુરતમાં
સૌથી ઓછું ૩ ટકા ગ્રીનકવર છે.