સુરતમાં રખડતા ઢોર મામલે નિયમો બદલાયા છે. શહેરમાં રખડતા ઢોર મુદ્દે દંડ નહીં સીધા જપ્ત કરી લેવાશે. આજથી કુલ 24 ટીમ શહેરભરમાં કાર્યવાહી હાથ ધરશે. આ માટે CCTV કેમેરાની મદદ લેવામાં આવશે.
સુરતમાં મનપા CCTV કેમેરાથી રખડતા ઢોરોને પકડશે
મનપા દ્વારા 63 સ્થળ નક્કી કરવામાં આવ્યાં
હવે રખડતા ઢોર મુદ્દે દંડ નહીં સીધા જપ્ત કરી લેવાશે
ગુજરાતમાં છેલ્લા કેટલાક વર્ષોથી રખડતા ઢોરનો ત્રાસ વધ્યો છે. રસ્તા ઉપર રખડતા આખલાઓની લડાઈમાં અનેકવાર રાહદારીઓ અને વાહન ચાલકો ભોગ બને છે. પૂર્વ નાયબ મુખ્યમંત્રી નીતિન પટેલને પણ અગાઉ રખડતા ઢોરે અડફેટે લીધા હતા. આવા બનાવોને અટકાવવા માટે સરકાર સફાળી જાગી છે. ઢોરના માલિકો સામે કાયદેસરની કાર્યવાહી કરવામાં આવી રહી છે. આ વચ્ચે સુરત મહાનગરપાલિકા દ્વારા મહત્વનો નિર્ણય લેવામાં આવ્યો છે.
મનપા CCTV કેમેરાથી રખડતા ઢોરોને પકડશે
ગુજરાત સરકારે બહુમતીના જોરે રખડતા ઢોર નિયંત્રણ કાયદો પસાર કરાવીને જબરી હિંમત દાખવી હતી પણ એ હિંમત લાંબી ચાલી શકી નથી. માલધારી સમાજના પ્રચંડ વિરોધના પગલે હવે સરકારને પીછેહઠ કરવાની કરજ પડી હતી. ઠેર-ઠેર વિરોધ ફાટી નીકળતા આ કાયદો પાછો ખેંચી લેવામાં આવ્યો હતો. જે બાદ ફરી રાજ્યના કેટલાક શહેરોમાં રખડતા ઢોરનો ત્રાસ શરૂ થઈ ગયો છે. સુરતમાં પણ રસ્તા પર રખડતા ઢોર મોટી માત્રામાં જોવા મળી રહ્યા છે. સુરત પાલિકાએ રખડતા ઢોરની સમસ્યા દૂર કરવા માટે મહત્વનો નિર્ણય લીધો છે. સુરત મહાનગર પાલિકા હવે કેમેરાથી રખડતા પશુઓ પર નજર રાખશે. આ માટે શહેરના 63 સ્થળોએ કેમેરા લગાવવામાં આવશે.
હવે રખડતા ઢોર મુદ્દે દંડ નહીં સીધા જપ્ત કરી લેવાશે
સુરતમાં રખડતા પશુ મામલે નિયમો બદલાયા છે. હવેથી પશુમાલિકોને દંડ ફટકારવાને બદલે પશુમાલિકોના પશુ જપ્ત કરી લેવામાં આવશે. આજથી કુલ 24 ટીમ શહેરભરમાં કાર્યવાહી હાથ ધરશે. જેમાં સવારે 9 ટીમ, બપોર બાદ 9 અને રાત્રે 2 ટીમ રાઉન્ડ ધ ક્લોક કામગીરી કરશે. આ ઉપરાંત 4 ટીમ RFID ચીપ લગાવવા કાર્યરત રહેશે. રખડતા પશુની સમસ્યા દૂર નહીં થાય ત્યાં સુધી આ અભિયાન ચાલું રહેશે.
રિવ્યૂ મીટિંગ પણ કરાશે
ઢોર જપ્તની કામગીરીના 10 દિવસ પછી રિવ્યૂ મીટિંગ પણ કરાશે. રખડતા ઢોર બાબતે કાયદેસર કાર્યવાહી અંગે પોલીસની મદદ લેવાશે. મહત્વનું છે કે, સુરત પોલીસ સાથે મિટિંગ કરી મનપાએ રખડતા ઢોર બાબતે ચર્ચા કરી છે.10 દિવસ પછી CM ભૂપેન્દ્ર પટેલ કામગીરીની સમીક્ષા કરશે.