બેદરકારી / રાજકોટમાં ખાનગી સ્કૂલોની મનમાની સામે વિદ્યાર્થીઓ બન્યા દંડનાં ભોગ, આખરે કોણ જવાબદાર!

રાજકોટ (Rajkot) ની 80 ટકા ખાનગી શાળાઓમાં પાર્કિંગ (parking) ની સુવિધા ન હોવાના કારણે વિદ્યાર્થીઓને ભારે પરેશાનીનો સામનો કરવો પડે છે. પાર્કિંગની સુવિધા ન હોવાના કારણે વિદ્યાર્થીઓ રસ્તા પર પોતાની ગાડીઓ પાર્ક કરે છે.

રસ્તા પર પાર્કિંગ થવાના કારણે ટ્રાફિક પોલીસકર્મી ગાડીઓ ટોઈંગ કરે છે. જેના કારણે દરરોજ હજારો વિદ્યાર્થીઓને દંડ ભરવા પડે છે. આ મામલે સ્થાનિકોમાં પણ ઉગ્ર રોષ જોવા મળ્યો છે. રસ્તા પર પાર્કિંગ થવાના કારણે સ્થાનિકોને પણ ભારે હાલાંકી ભોગવવાનો વારો આવ્યો છે.

તમને જણાવી દઇએ કે રાજકોટમાં શાળાઓની બહાર 'નો પાર્કિંગ ડ્રાઇવ'ની શરૂઆત કરતા શહેરમાં જે-જે શાળાઓ વિદ્યાર્થીઓને પાર્કિંગ માટે પાર્કિંગનાં ગેટ નથી ખોલતી તેવી સ્કૂલો વિરૂદ્ધ કાર્યવાહી કરવાને બદલે શાળાની બહાર વાલીઓ અને સ્કૂલ વાન ચાલકો પોલીસની ઝપટમાં આવી ગયા હતા. એટલે કે શાળાની બહાર ગેરકાયદે પાર્કિંગને લઇ સીસીટીવીનાં આધારે લોકોને ઇ મેમો ફટકારવામાં આવ્યા હતાં.

મ્યુનિસિપલ કમિશ્નરે જણાવ્યું હતું કે, શાળા સંચાલકો પાસેથી પાર્કિંગ મુદ્દે બાંહેધરી પણ લેવામાં આવી રહી છે પરંતુ છતા જો સંચાલકો સ્કૂલની અંદર પાર્કિંગમાં વ્હીકલ પાર્ક નહીં કરવા દે તો તેમની સામે કડક કાર્યવાહી કરવામાં આવશે.

વધુમાં તમને જણાવીએ કે શહેરનાં કાલાવડ રોડ, યુનિ. રોડ પર સવારનાં મહાનગરપાલિકા (Rajkot Municipal Corporation) નો કાફલો વિજીલન્સ બંદોબસ્ત સાથે નીકળી પડ્યો હતો. સેંટ મેરી સ્કૂલની બહાર વાનચાલકોએ અધિકારી વિરૂદ્ધ ફરિયાદ કરી હતી કે શાળાનાં સંચાલકો જ અંદર પાર્ક કરવા દેતા નથી. એટલે કે પછી બહાર વાહન પાર્ક કરવાને લઇ છાશવારે 500 રૂ.નો દંડ ભરવો પડે છે.