IPL ક્રિકેટ મેચ પર સટ્ટો રમવાની જાણે આજકાલ પ્રથા જ બની ગઇ હોય એમ વારે તહેવારે સટ્ટો રમતા લોકોને પોલીસ પકડી પાડે છે, જ્યારે આજે અમદાવાદ શહેરના સાબરમતી વિસ્તારમાંથી સટ્ટો રમાડતા બે લોકોની પોલીસે ધરપકડ કરી છે, તો રાજકોટમાં પણ ક્રિકેટ મેચ પર સટ્ટો રમાડતા શખ્સોને ઝડપી પાડવામાં આવ્યા છે. જોઇએ સમગ્ર અહેવાલ.
અમદાવાદમાં IPL ક્રિકેટ મેચ પર સટ્ટો રમાડતા બે લોકોની ધરપકડ કરી છે. અમદાવાદના સાબરમતી વિસ્તારમાંથી મુંબઇનું નેટવર્ક ઝડપાયું છે. સાબરમતી વિસ્તારમાં બેસી મુંબઇના બુકીઓ સટ્ટો રમાડતા હતાં. ક્રાઇમબ્રાન્ચે મુંબઇના જીત જૈન અને કુનીક જૈનને ઝડપી પાડ્યા છે. મેચ રમવા સુરતના મૌલિક પટેલે ID આપ્યાનું ખુલ્યું છે. જેમાં 8 મોબાઈલ, લેપટોપ અને LCD સહિતનો મુદ્દામાલ જપ્ત કરવામાં આવ્યો છે.
તો આ તરફ રાજકોટમાં સ્ટેટ વિજિલન્સ દ્વારા દરોડા પાડવામાં આવ્યા હતા. જેમાં યાજ્ઞિક રોડ પર આવેલ રાજકમલ એપાર્ટમેન્ટમાં દરોડા પાડતા ક્રિકેટ મેચ પર સટ્ટો રમાડતા શખ્સોને ઝડપી પાડવામાં આવ્યા હતા. આ દરોડામાં મોટા બુકીઓ સહિત અનેક લોકોની સંડોવણી સામે આવી છે. મહત્વનું છે કે, સ્થાનિક પોલીસની રહેમનજર હેઠળ ચાલતું સટ્ટા બજાર ઝડપાતા અનેક સવાલો ઉઠી રહ્યા છે. ત્યારે 7 જેટલા લોકોની પૂછપરછની તજવીજ હાથધરવામાં આવી. જેમાં સચિન ઠક્કર સહિત 50 જેટલા બુકીઓના નામ સામે આવ્યા છે.