વિવાદ / 'હું ભીડથી ડરવાવાળો નથી, અને ના તો...', શિંદેની ટિપ્પણી પર મહારાષ્ટ્રમાં વિવાદ બાદ કામરાની પ્રતિક્રિયા

સ્ટેન્ડ-અપ કોમેડિયન કુણાલ કામરા પોતાના શો "નયા ભારત" માં એક ગીત દ્વારા શિંદે પર નિશાન સાધ્યું હતું. આ ગીતમાં, તેમણે 2022 માં શિવસેનાના વિભાજન અને શિંદેના બળવાનો ઉલ્લેખ કર્યો હતો , અને તેમને "દેશદ્રોહી" ગણાવ્યા હતા. આ ટિપ્પણીથી શિંદેના નેતૃત્વ હેઠળના શિવસેનાના કાર્યકરો નારાજ થયા હતા, જેના પગલે રવિવારે હેબિટેટ સ્ટુડિયો જ્યાં આ શોનું શૂટિંગ થઇ રહ્યું હતું ત્યાં તોડફોડ કરવામાં આવી હતી.

'મને આ ભીડથી ડર નથી'

કુણાલ કામરાએ આ મામલે સવાલો ઉઠાવ્યા તેમણે કહ્યું કે, 'મીડિયાએ યાદ રાખવું જોઈએ કે ભારતમાં પ્રેસ સ્વતંત્રતા 159મા ક્રમે છે, હું આ ટોળાથી ડરવાનો નથી અને હું છુપાઈશ પણ નહીં. હું મારા પલંગ નીચે છુપાઈને આ વિવાદ શાંત થાય તેની રાહ જોઈશ નહીં' સાથે કાયદાના સમાન ઉપયોગ પર પ્રશ્ન ઉઠાવતા, કામરાએ કહ્યું, 'હું પોલીસ અને કોર્ટને સહકાર આપીશ, પરંતુ શું મજાકના ગુસ્સામાં તોડી પાડવાને વાજબી ઠેરવનારાઓ સામે કાયદો ન્યાયી અને સમાન રીતે લાગુ કરવામાં આવશે? અને બીએમસીના બિનચૂંટાયેલા સભ્યો સામે પણ, જેઓ આજે કોઈપણ સૂચના વિના હેબિટેટ આવ્યા અને હથોડાથી સ્થળ તોડી નાખ્યું?'

હું મારો આગામી શો એલ્ફિન્સ્ટન બ્રિજ પર કરીશ - કામરા

તેમણે હેબિટેટ સ્ટુડિયો પરના હુમલાની નિંદા કરતા કહ્યું, "મનોરંજન સ્થળ ફક્ત એક પ્લેટફોર્મ છે. હેબિટેટ (અથવા અન્ય કોઈ સ્થળ) મારા રમૂજ માટે જવાબદાર નથી, કે હું શું કહું છું કે કરું છું તેના પર તેનો કોઈ નિયંત્રણ નથી. કોઈ રાજકીય પક્ષ હાસ્ય કલાકારના શબ્દો માટે સ્થળ પર હુમલો કરે તે ટામેટાં ભરેલી ટ્રકને ઉથલાવી દેવા જેટલું વાહિયાત છે કારણ કે તમને પીરસવામાં આવેલું બટર ચિકન ગમ્યું ન હતું." કામરાએ પોતાના આગામી સ્થાન વિશે મજાકમાં કહ્યું, "કદાચ મારા આગામી શો માટે હું એલ્ફિન્સ્ટન બ્રિજ અથવા મુંબઈમાં કોઈ અન્ય માળખું પસંદ કરીશ જેને ઝડપથી તોડી પાડવાની જરૂર છે."

તે જ સમયે, તેમણે રાજકીય નેતાઓને ચેતવણી આપી, "જે રાજકીય નેતાઓ મને પાઠ ભણાવવાની ધમકી આપી રહ્યા છે તેમણે સમજવું જોઈએ કે અભિવ્યક્તિની સ્વતંત્રતાનો અધિકાર ફક્ત શક્તિશાળી અને ધનિકોની ખુશામત કરવા માટે નથી. શક્તિશાળી જાહેર વ્યક્તિ પર મજાક કરવાથી મારા અધિકારનું સ્વરૂપ બદલાતું નથી. જ્યાં સુધી હું જાણું છું, આપણા નેતાઓ અને આપણા રાજકીય સર્કસ વિશે મજાક કરવી ગેરકાયદેસર નથી."

આ પણ વાંચો : 'બધું ફ્લોમાં થઈ ગયું...', સમય રૈનાએ મહારાષ્ટ્ર સાયબર સેલને આપ્યું નિવેદન, સ્વીકારી ભૂલ

ખાર પોલીસ સ્ટેશનમાં ફરિયાદ દાખલ કરવામાં આવી હતી

આ ઘટના બાદ, શિવસેના (શિંદે જૂથ) ના ધારાસભ્ય મુરજી પટેલે ખાર પોલીસ સ્ટેશનમાં કામરા વિરુદ્ધ ફરિયાદ નોંધાવી હતી, જેના આધારે તેમની સામે FIR નોંધવામાં આવી હતી. આ ઉપરાંત, યુવા સેનાના કાર્યકરોએ કામરા વિરુદ્ધ વિરોધ પ્રદર્શન કર્યું અને તેમના ફોટા સળગાવ્યા. મહારાષ્ટ્રના મુખ્યમંત્રી દેવેન્દ્ર ફડણવીસે પણ આ મામલે કડક પ્રતિક્રિયા આપી હતી અને કહ્યું હતું કે, "કુણાલ કામરાએ નાયબ મુખ્યમંત્રી એકનાથ શિંદેનું અપમાન કર્યું છે. આવી નિમ્ન સ્તરની કોમેડી સહન કરવામાં આવશે નહીં."

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ