કોરોના વાયરસ / મુંબઈમાં 120 વર્ષના ઈતિહાસમાં જે ક્યારેય બંધ ન થયું તે કોરોનાને કારણે બંધ થયું, કરી આ અપીલ

• 120 વર્ષનાં ઈતિહાસમાં પહેલીવાર બંધ થશે ડબ્બાવાળાઓની સર્વિસ 
• કોરોના વાયરસનાં કારણે લેવાયો નિર્ણય 
• ડબ્બાવાળા એસોસિયેશનના અધ્યક્ષે પગાર ન કાપવા લોકોને કરી અપીલ 

મુંબઈનાં ડબ્બાવાળાની સર્વિસ વિશ્વભરમાં પ્રસિદ્ધ છે. મુંબઈમાં ગમે તેટલી કપરી પરિસ્થિતિ હોય ડબ્બાવાળાઓએ હંમેશા પોતાની સર્વિસ ચાલુ રાખી છે. મુંબઈમાં મોન્સૂનમાં આ ડબ્બાવાળાઓએ લોકોનાં ઘરનું ટિફિન સ્કૂલ અને ઓફીસ સુધી પહોંચાડ્યું છે. એવામાં કોરોના વાયરસનાં કારણે ડબ્બાવાળાઓની સર્વિસને મોટો ફટકો પડ્યો છે. 

કોરોનાવાયરસનાં કારણે પહેલીવાર 'મુંબઈ ડબ્બાવાલા એસોસિએશન'એ પોતાની સર્વિસ અમુક દિવસ માટે બંધ કરવાનો નિર્ણય લીધો છે. કોરોના વાયરસનાં પ્રકોપનાં કારણે 31મી માર્ચ સુધી આ સેવા બંધ રહેશે. મીડિયા સાથેની વાતચીતમાં ડબ્બાવાલા એસોશિયેશનનાં અધ્યક્ષ ગંગારામ તાલેકરે સ્વીકાર્યું કે મહારાષ્ટ્રનાં સીએમે અપીલ કરી હતી કે બને એટલી ભીડ ઓછી કરવી જોઈએ કારણ કે ભીડમાં કોરોનાં વાયરસ વધુ ફેલાય છે. 

નોંધનીય છે કે સરકારનાં નિર્ણય બાદ રાજ્યમાં શાળા કોલેજની સાથે અનેક ઓફીસ પણ બંધ હોવાથી ડબ્બાવાળાઓની સર્વિસ પર ખૂબ અસર પહોંચી હતી. એક અહેવાલ અનુસાર પહેલાં એક ડબ્બાવાળા એક સાથે 30થી 35 ડબ્બા લઇને જતાં હતા જેની સંખ્યા ઘટીને માત્ર 10થી 12 ટિફિન જ રહી ગયા હતા. 

ડબ્બાવાળા એસોસિયેશનનાં અધ્યક્ષે અપીલ પણ કરી કે 12 દિવસ જે સેવા આપી નથી શકતા તેમના પગાર ન કાપવામાં આવે કારણ કે કોરોના વાયરસનાં કારણે સર્વિસ બંધ કરવામાં આવી રહી છે. સાથે જ સરકારની અપીલનાં કારણે જ આ નિર્ણય લેવામાં આવ્યો છે. 

નોંધનીય છે કે કોરોના વાયરસનાં કારણે બંધ કરવામાં આવનાર સર્વિસ પહેલી એપ્રિલથી રાબેતા મુજબ ચાલુ કરી દેવામાં આવશે.