કોરોના વાયરસના કહેર સામે સમગ્ર દેશ લડી રહ્યો છે. લોકડાઉનને કારણે ફિલ્મ ઈન્ડસ્ટ્રીથી જોડાયેલા તમામ કામ મહિનાઓ સુધી બંધ થઈ ગયા હતા. પણ હવે લોકડાઉનમાં છૂટ મળતા ધીરે ધીરે શૂટિંગનું કામ શરૂ થઈ રહ્યું છે. પરંતુ હજી પણ ફિલ્મમેકર્સની મુશ્કેલીઓ ઓછી થઈ નથી. હાલમાં જ જાણીતા ફિલ્મ પ્રોડ્યૂસર મુકેશ ભટ્ટ અત્યારની સ્થિતિને કારણે એકદમ લાચાર દેખાયા હતા. તેમણે જણાવ્યું કે, તેમની મોસ્ટ અવેટેડ ફિલ્મ 'સડક 2'ને લઈને તેમણે મોટો નિર્ણય લીધો છે.
કોરોનાના કહેરને કારણે ફિલ્મમેકર્સ મુશ્કેલીમાં
ફિલ્મમેકર્સને ઓનલાઈન ફિલ્મો રિલીઝ કરવી પડી રહી છે
તો હવે મહેશ ભટ્ટે તેમની ફિલ્મ સડક 2ને લઈને લીધો આ નિર્ણય
થોડાં સમય પહેલાં એવા સમાચાર હતા કે આલિયા ભટ્ટ, આદિત્ય રોય કપૂર, સંજય દત્ત અને પૂજા ભટ્ટ સ્ટારર મહેશ ભટ્ટની મોસ્ટ અવેટેડ ફિલ્મ 'સડક 2' સિનેમાઘરોમાં નહીં પણ ઓટીટી પ્લેટફોર્મ પર રિલીઝ થશે. તો હાલમાં જ ફિલ્મના પ્રોડ્યૂસર મુકેશ ભટ્ટે આ વાતની પુષ્ટિ કરી છે કે ફિલ્મમેકર મહેશ ભટ્ટ તેને ડિજિટલ પ્લેટફોર્મ પર રિલીઝ કરશે. એક રિપોર્ટ મુજબ મુકેશે કહ્યું કે આ મલ્ટિસ્ટારર ફિલ્મને ઓટીટી પર રીલીઝ કરવાનો નિર્ણય આખરે કેમ લેવામાં આવ્યો?
મુકેશ ભટ્ટે કહ્યું- 'કોવિડ -19 કેસ દરરોજ ઘટવાના બદલે વધી રહ્યા છે. આવી સ્થિતિમાં તમને લાગે છે કે થિયેટરો ખુલશે? અને જો ખોલવામાં આવે તો પણ લોકો ફિલ્મ જોવા થિયેટરોમાં જશે? લોકોને તેમના પરિવારની સલામતીની ચિંતા છે. વર્તમાન સંજોગોમાં લોકોના જીવનની સલામતી મહત્વપૂર્ણ છે. તેમણે કહ્યું કે 'આ કારણોસર હું સડક 2નું ડિજિટલ રિલીઝ કરવા માટે મજબૂર છું. મને ભવિષ્યમાં કોઈ આશા દેખાતી નથી. અમારી પાસે બીજો કોઈ વિકલ્પ નથી '.
તમને જણાવી દઈએ કે સ્પેશિયલ ફિલ્મ્સ અને ફોક્સ સ્ટાર સ્ટુડિયો દ્વારા નિર્મિત મલ્ટિસ્ટારર ફિલ્મ 'સડક 2' 10 જુલાઈએ રિલીઝ થવાની હતી. કોરોના વાયરસને કારણે આ ફિલ્મની રિલીઝ મુલતવી રાખવામાં આવી રહી છે અને હવે તેને ડિજિટલ પ્લેટફોર્મ પર રિલીઝ કરવાનો નિર્ણય લેવામાં આવ્યો છે. 'સડક 2' એ 1991માં પૂજા ભટ્ટ અને સંજય દત્ત સ્ટારર ફિલ્મ 'સડક'ની સિક્વલ છે.